BOBONARO, 06 fevereiru 2023 (TATOLI)- Diresaun servisu edukasaun munisípiu Bobonaro, sei implementa programa merenda eskolár iha semana oin.
Tuir data tentativa hosi Diresaun servisu edukasaun munisipál Bobonaro sei implementa programa merenda eskolár tinan 2023 iha loron-segunda, 13 fevereiru iha semana oin totál loron efetivu 164.
Diretór servisu edukasaun munisípiu Bobonaro, Crispim Moniz, haktuir foin lalais ne’e sosializa ona matadalan programa ne’e ba Ekipa Jestaun Programa (EJP) merenda eskolár no iha ámbitu ne’e distribui kedas matadalan programa refere.
Enkuantu iha loron-segunda, 06 fevereiru Ekipa Jestaun Programa (EJP) merenda eskolár 23 hahú loke ona konta bankária idak-idak nian.
Notísia relevante: Edukasaun Bobonaro hetan millaun $1-resin implementa merenda eskolár
Nia subliña, ligadu ho asuntu refere parte edukasaun sei hala’o enkontru ho Prezidente Autoridade Munisípiu Bobonaro no diretór relevante sira hanesan, finansa aprovizionamentu, saúde no diretór seguransa alimentár atu bele deside loron formasaun ba EJP no mos asina kontratu atubele transfere fundu ba konta bankária ekipa impmementadór programa refere.
“Nia data tentativa ne’e dia 13, maibé di’ak 13 mós konforme,” Diretór Crispim informa ba jornalista sira iha kna’ar fatin, Bairru Maravilha, suku Odomau, segunda ne’e.
Purtantu servisu edukasaun munisipál Bobonaro hetan alokasaun orsamentu hosi autoridade munisípiu hamutuk $1,860,999.84. Hosi montante ne’e fahe ba nível pre-eskolár 41 ho valór $155,256 no ensinu báziku 135 ho valór orsamentu $1,762.708.
Programa ne’e rasik sei benifísia ba estudante na’in-27,018 komposta hosi nível pre-eskolár 2.194 no ensinu báziku 24,824.
Notísia relevante: Edukasaun Bobonaro presiza tán karteira eskolár 165 ba eskola foun
Jornalista: Sérgio da Cruz
Editór: Evaristo Soares Martins
