DILI, 10 fevereiru 2023 (TATOLI)—Sentru Lojístiku Nasional (CLN, sigla portugál), iha ona planu tinan ne’e, sei sosa foos tonelada 5.000 resin hosi nasaun Vietname.
“Tinan ne’e, ita iha ona planu atu sosa foos importasaun hamutuk 5.000 resin tonelada hosi nasaun Vietname”, Diretór Transporte no Lojístiku iha CLN, Tito da Costa, hateten ba Agência Tatoli, iha nia-knaar fatin, Bebora Dili, sesta ne’e.
Notisia relevante : CLN sei iha estoke foos 350.000 tonelada
Nia dehan, tinan ne’e, Governu prevee orsamentu milliaun $6 atu sosa foos, hosi orsamentu ne’e milliaun $3 sei sosa foos importasaun no milliaun $3 atu sosa produtu iha rai-laran.
“Ba produtu rai-laran hosi orsamentu milliaun tolu ne’e, sei sosa haree kulit tonelada 3.000, inklui produtu sira seluk hanesan batar, fore-mean, fore-rai, foremungu no koto,” Tito dehan.
Kona-ba prosesu atu sosa foos importasaun, nia dehan, konkúrsu públiku sei loke iha fulan marsu tinan ne’e, no kompañia ne’ebe manán mak sei sosa.
Notisia relevante : CLN sei sosa hare-kulit tonelada 3000 iha territóriu nasionál
Jornalista : Arminda Fonseca
Editora : Armandina Moniz
