DILI, 16 fevereiru 2023 (TATOLI) – Diresaun-Jerál Estatístika rejista, iha janeiru, inflasaun 3,8% iha Índise Presu Konsumidór (IPK) kompara ho dezembru 2022 iha 0,6%.
Dadus diresaun-jerál ne’e hatudu katak kreximentu ne’e kontribui husi grupu hahán no bebida la’ós alkoólika 4,3%, álcool no tabaku 15,5%, edukasaun 7,0%, uma 1,1%, komunikasaun 1,0% no transporte 0,1%. Relasiona ho presu ekipamentu no manutensaun mobiláriu uma-laran tun 1,1% no rekreasaun no kultura 1,7%, ne’ebé sai hanesan mudansa kontrariu ba inflasaun grupu hotu.
Diretór-Jerál Estatístika, Elias dos Santos Ferreira, informa liuhosi nota ne’ebé Agência Tatoli asesu katak presu hahán no bebidas la’ós alkoólika sa’e tamba hetan impaktu maioria hosi sub-grupu modo-tahan 7,1%, masin-midar, marmelada, bani-been, xokolate no hahán midar 5,4%, na’an 4,4%, mina no bokur 5,2%, paun no sereál 10,6%, foos 1,4%, ikan no hahán tasi 4,4%, bee, bebidas no sumu ai-fuan 7,5%, ai-fuan 2,4% no susu-been, keiju no manutolun 1,4%.
“Produtu ai-han (iha deflasaun) -1,2%, no kafé, xá, no kokoa -1,9% sai hanesan mudansa kontrariu ba inflasaun grupu hahán no bebidas la’ós alkoólika”, nia afirma.
Mudansa persentajen IPK anuál sa’e 9,8% kompara entre janeiru 2023 no janeiru 2022, hetan kontribuisaun husi grupu hahán no bebidas la’ós alkoólika 11,0%, transporte 11,0%, alkool no tabaku 34,0%, uma 2,7%, ekipamentu no manutensaun mobiláriu uma-laran 0,8%, edukasaun 5,6%, komunikasaun 0,9%, no hatais no sepatu 1,2% ba anuál janeiru 2023.
“Grupu rekreasaun no kultura -0,7% sai hanesan mudansa kontráriu ba inflasaun grupu hotu ba anuál janeiru tinan ne’e”, nia akresenta.
Nune’e, inflasaun tradeable (mudansa presu produtu hotu ne’ebé iha dependénsia maka’as ba kompetisaun merkadu internasionál ) sa’e 4,5% no non-tradeable (mudansa presu produtu hotu ne’ebé iha dependénsia maka’as ba fatór merkadu doméstiku) sa’e mós 2,3% iha mensál kompara entre janeiru 2023 no dezembru2022. Inflasaun tradeable sa’e 12,9% no non-tradeable mós sa’e 2,6% iha anuál kompara entre janeiru 2023 no janeiru 2022.
Jornalista: Antónia Gusmão
Editora: Maria Auxiliadora
