DILI, 22 fevereiru 2023 (TATOLI)— Sekretariadu Konferénsia Episkopál Timorense (CET, sigla portugál), husu sarani Katólika Timor-Leste (TL) atu kumpre dever nu’udar sidadaun di’ak hodi partisipa direita iha loron votasaun ba eleisaun Parlamentár tinan 2023 ne’e.
Arsebispu Arkidoseze Metropolitana Dili, no hanesan Pró Prezidente CET, Don Virgílio Kardeál do Carmo da Silva, SDB husu sarani sira kumpre dever nu’udar sidadun di’ak partisipa iha eleisaun parlamentár tanba haree no konsidera dekretu Prezidensiál númeru 9/2023 kona-ba loron eleisaun lejislativa ne’ebé sei realiza iha loron 21 fulan maiu tinan 2023, ne’ebe monu iha loron domingu.
Don Virgílio, hateten, haree ba loron eleisaun ne’ebé monu iha loron domingu, hafoin rona preokupasaun sarani Katólika iha Timor-Leste kona-ba data refere, CET tetu ho atensaun hato’o ba sarani-sira hotu katak posizaun uma-kreda Katólika Timor-Leste mak respeita desizaun Prezidente Repúblika tuir dekretu Prezidensial númeru 9/2023.
“Apela ba sarani katólika iha Timor-Leste atu kumpre dever nu’udar sarani di’ak hodi partisipa nafatin misa iha loron domingu tuir Santa Kreda nia hanorin, no husu sarani Katólika iha Timor-leste atu kumpri dever nu’udar sidadaun di’ak hodi partisipa direita iha votasaun ba elesaun lejislativa iha loron domingu,” Don Virgílio Kardeál do Carmo da Silva, hateten liuhosi nota komunikadu ne’ebé Agência Tatoli, asesu kuarta ne’e.
Don Virgílio, fó hanoin ba timor-oan sira hotu atu ezerse direitu partisipasaun polítika ho paz, domin no responsabilidade hodi respeita malu nafatin iha eleisaun lejislativa ne’e, desde periodu kampaña polítika to’o loron votasaun.
“Maromak haraik nafatin grasa no bensaun ba povo no rai doben Timor-Leste atu moris iha paz no hakmatek,” Don Virgílio dehan.
Jornalista : Arminda Fonseca
Editora : Armandina Moniz
