DILI, 22 fevereiru 2023 (TATOLI) – Primeiru-Ministru (PM), Taur Matan Ruak, afirma Indonézia manifesta disponibilidade apoia Timor-Leste, liuliu iha setór ekonómiku.
Xefe Governu deklara asuntu ne’e depois realiza vizita ofisiál bá Indonézia no viajen partikulár bá Singapura foin lalais.
“Iha vizita bá Indonézia, ami rua Prezidente Repúblika ko’alia asuntu tolu, ida halo balansu kona-ba ita-nian kooperasaun iha tinan 20 nia laran. Iha 2022 ne’e, Indonezia no Timor-Leste estabelese tinan 20 kooperasaun diplomátika bainhira restaura ita-nian indepedénsia”, Taur hatete, ohin, liuhusi konferénsia imprensa hafoin to’o iha Aeroportu Internasionál Prezidente Nicolau Lobato, Comoro.
Xefe Ezekutivu hatutan, iha tinan 20 ne’e, rai rua refere halo balansu barak iha aspetu polítiku, ekonómiku, komersiál no sosiukulturál.
“Iha aspetu polítiku, ita haree iha vizita nível aas hosi Indonézia mai Timór no hosi Timór ba Indonézia laiha prezidente ida hosi Indonézia la vizita ita-nian rain. Nomós laiha prezidente ida ita-nian la vizita Indonézia, entaun interkámbiu polítiku ne’e di’ak tebes”, nia realsa.
Aleinde ne’e, aspetu ida seluk mak rekonsiliasaun tanba iha susesu boot, nomós aspetu sosiukulturál hanesan hotu-hotu hatene katak timoroan kuaze rihun 600 mak vizita Indonézia kada tinan. “Entaun, ne’e pontu ida halo balansu kona-ba ita-nian relasionamentu tinan 20”.
Iha ámbitu enkontru ho Xefe Estadu Indonézia, Jokowi, Primeiru-Ministru Matan Ruak informa mós kona-ba situasaun rai-laran nian.
“Susesu ne’ebé ita hetan enkuantu dezafiu sira ne’ebé ita sei iha, ita presiza serbisu maka’as iha rai-laran ho ita-nian parseiru sira hodi ultrapasa lakuna sira mak hanesan, pobreza multidimensionál ne’e iha 48%, seluk maka má nutrisaun 47%, inseguransa alimentár 36% no dezempregu 9,6%”, nia salienta.
Iha sorumutu ne’e, Xefe Ezekutivu timoran no Xefe Estadu indonéziu analiza uitoan saida maka atu halo iha tempu sira mai. “Ida ne’e ami konsentra ba asuntu rua importante, hanesan ASEAN, oinsá maka Timor-Leste bele prepara-aan di’ak liu para bele responde roadmap ne’ebé ASEAN aprezenta to’o ita sai membru”, konklui.
Rekorde katak Primeiru-Ministru hala’o vizita ofisiál bá Repúblika Indonézia, entre 11 no 14 fevereiru, hodi diskute kona-ba kooperasaun nasaun rua ne’e.
Aproveita vizita refere, Xefe Governu mós hato’o agradesimentu pesoál ba Prezidente Jokowi no Governu Indonézia nian apoiu inkondisionál ba Timor-Leste hodi ohin sai ona nu’udar país observadór.
Notísia relevante: PM vizita ofisiál ba Indonézia hodi diskute kooperasaun bilaterál
Jornalista: Antónia Gusmão
Editora: Maria Auxiliadora
