DILI, 27 fevereiru 2023 (TATOLI)—Deputadu KHUNTO hosi bankada Governu, Luis Roberto, preokupa Deputadu opozisaun liu-liu CNRT ne’ebé kontinua auzénsia iha plenária ajenda ba eleisaun komisáriu Komisaun Antí Korrupsaun (CAC, siglá portugés).
Notísia Relevante: PN adia eleisaun ba Komisáriu CAC tanba la prenxe korum
“Ha’u kestiona kona-ba ita-nia eleisaun ba komisáriu CAC to’o agora seidauk prienxe korum atu halao eleisaun no troka, depois ita-nia maluk Deputadu sira hosi CNRT mós haluha tiha nia papé,” Deputadu Luis Roberto hato’o nia preokupasaun ne’e liuhosi reuniaun plenária PN, segunda ne’e.
Tanba ne’e, atuál Vise Prezidente Parlamentu Nasionál ne’e hateten órgaun PN ne’e iha regra atu bele haree deputadu sira-ne’ebé kontinua abandona reuniaun plenária.
“Ne’ebé ba maluk Deputadu sira-ne’ebé la marka prezensa loron lima tutuir malu, ne’e saida mak ita atu halo bazea ba rejimentu ne’ebé iha, ita labele halimar tanba ne’e órgaun soberanu,” nia hateten.
Deputada Fretilin, Maria Ana Bela Sávio, hateten ajenda ohin loron nian ba eleisaun komisáriu CAC dala hira ona maluk Deputadu sira hosi CNRT abandona hela.
“Tanba saida, dala hira ona hakarak ita atu halo eleisaun ka mantein ho ida komisáriu ne’ebé mandatu hotu ona,” nia dehan.
Tuir nia, ida-ne’e ita atu promove korrupsaun ka atu kombate korrupsaun, kakarak kombate korrupsaun entaun tama mai ita ko’alia.
Deputadu CNRT, José Virgílio, hateten presiza substitui kandidatu komisáriu CAC tanba kandidatu ne’ebé aprezenta diskonfia envolve iha kazu balun.
Prezidente Parlamentu Nasionál, Aniceto Longuinhos Guterres Lopes, hateten eleisaun ba komisáriu CAC nia-parte foin daudaun halo despaixu atu distribui paresér legál ida hosi sosiedade sivil nian, JSMP ne’ebé sira krítika PN kona-ba atrazu iha eleisaun ida-ne’e, sira konsidera ne’e afeta funsionamentu CAC.
Iha parte seluk, nia dehan, meza kontinua ajenda no sei haree medida saida mak atu aplika ba deputadu sira kontinua auzénsia plenária.
Enkuantu, meza PN halo ona ajenda liuhosi reuniaun plenária ba eleisaun komisáriu CAC foun dala haat ka lima ona, no segunda (27/02) ohin kontinua ajenda maibé korum la prienxe tanba tuir regra presiza Deputadu prezente na’in-49.
Jornalista : Nelson de Sousa
Editór : Cancio Ximenes
