OÉ-CUSSE 24 marsu 2023 (TATOLI) – Komisaun Nasionál Eleisaun (CNE, sigla portugés), sesta ne’e realiza edukasaun sívika kona-bá regra no prosedimentu kampaña eleitorál, krime eleitorál no prosedimentu hato’o keixa reklamasaun ba eleitór sira hodi hametin sentidu pertense no eleva taxa partisipasaun iha eleisaun parlamentár 2023.
Atividade edukasaun sívika ne’e realiza iha salaun Igreja parókia Padiae, suku Lalisuk, sub-rejiaun Pante Makasar, alvu ba suku haat mai hosi Cunha, Lalisuk, Naimeko no suku Bobokase, pertense ba sub-rejiaun Pante Makasar.
Diretór CNE Oé-Cusse, Tomás Oqui Meta, informa, edukasaun ne’e nu’udar preparasaun hosi CNE ba eleisaun parlamentár tanba bazea kalendáriu eleisaun ne’e Prezidente Repúblika promulga ona sei akontese iha loron 21 maiu tinan ne’e.
“Tán ne’e ohin ita hahú hala’o edukasaun sívika ba ba sidadaun sira, atu esplika fó koñesimentu kona-bá aktu eleitorál sira, liuliu ba kampaña eleitorál, krime eleitorál no sistema eleisaun parlamentár rasik, no keixa reklamasaun sira, atu nune’e iha prosesu eleisaun ne’e bele hasa’e taxa partisipasaun,”Tomás Oqui Meta, ko’alia iha Padiae, Oe-Cusse.
Alende liuhosi edukasaun sívika bele kontribui hamenus krime eleitorál, nune’e kampaña no eleisaun parlamentár bele la’o ho susesu, espesiálmente iha Oé-Cusse Oé-Cusse, bele la’o ho pás no estabilidade.
“Programa edukasaun sívika ne’e, ami sei hala’o ba fatin neen kobre ba sub-rejiaun haat; Oésilo, Pássabe no Nítibe, ohin ita hahú uluk iha Pante Makasar,” nia afirma.
Segundu Komandante PNTL eskuadra sub-rejiaun Pante Makasar, Asistente Polísia Damião Kenat, hatete, asuntu sseguransa nu’udar responsabel koletiva presiza kontribuisaun hosi parte polítiku no autoridade hamutuk ho komunidade hodi fó susesu ba selebrasaun festa demokrasia ne’e.
“Ohin, ha’u reprezenta komandu sub-rejiaun Pante Makasar, informa asuntu seguransa ba ita hotu katak, seguransa ne’e iha ita-hotu nia leet, ita hamutuk tau liman ho hanoin hamutuk garante situasaun no fó susesu ba kampaña no eleisaun,” Damião Kenat fó hanoin.
Parte PNTL mós sei koloka nia membru sira atu fó apoia ba kada sentru votasaun sira iha territóriu Oé-Cusse, tán ne’e maka karik mosu dezintendimentu husu ita-hotu kolabora uza meiu ida-ne’ebé bele fó solusaun, la’ós ho meiu atu sobu fali.
Durante CNE realiza edukasaun sívika ne’e loke mós diálogu aberta promove deskusaun husu no hatán kuaze oras rua nia laran.
Partisipa iha edukasaun sivika ne’e mai hosi Provedoria Diretu Humanu no Justisa (PDHJ), Sekretariadu Tékniku Administrasaun Eleitorál (STAE), Igreja Katólika, estrutura suku haat Cunha, Lalisuk, Naimeko no Bobokase, profesór, estudante no komunidade sira.
Tuir dadus provizóriu ne’ebé STAE rejiaun Oé-Cusse rejista ona sentru votasaun 80 no estasaun votasaun 115 maka estabelese iha territóriu Oé-Cusse, ho totál eleitór provizória bazea dadus 2022 hamutuk 53.153, komposta hosi mane 27.407 no feto 26.106, tanba dadus 2023 sei sinkroniza.
Prezidente Repúblika José Manuel Ramos Horta, dekreta ona loron eleisaun parlamentár ba períodu 2023-2027 ne’e sei akontese iha 21 maiu tinan ne’e, no kaléndariu ba kampaña eleitorál sei hahú iha loron 19 abril termina iha loron 19 maiu 2023.
Jornalista : Abílio Elo Nini
Editór : Evaristo Soares Martins
