STAE-CNE hahú diskute modelu bulletin votu
DILI, 31 marsu 2023 (TATOLI)– Diretór Jerál Sektretariadu Tékniku Administrasaun Eleitorál (STAE), Acilino Manuel Branco, hateten hahú halo koordenasaun ho Komisaun Nasionál Eleisaun (CNE,sigla Portugés) atu diskute no haree hamutuk modellu bulletin votu ba partidu polítiku 17, ne’ebé konkorre eleisaun Parlamentár, iha 21 maiu 2023.
Notísia relevante:TR anúnsia númeru sorteiu ba partidu polítiku konkore eleisaun lejizlativa 2023
“Ita mós koordena hela ho parte Komisaun Nasionál Eleisaun atubele komunika ho Tribunál Rekursu hodi hato’o mós ba iha Komisaun Nasionál Eleisaun kona-ba sigla, bandeira ou emblema sira ne’ebé mak hatete tuir lei, hodi bele haree hamutuk modelu bulletin votu”, Diretór ne’e hateten ba Agência TATOLI, iha kna’ar fatin-Dili, sesta ne’e.
Elementu bulletin votu ne’ebé define tuir lei eleisaun parlamentár númeru 6/2006 ne’ebé altera númeru 9/2017 ne’ebé iha artigu 39, hatete bandeira ou emblema ne’e tenke hanesan ho sigla bandeira ou emblema ne’ebé partidu sira submete inskrisaun hanesan partidu polítiku iha Ministériu Justisa no Tribunál Rekursu.
“Ami husu ba kada partidu atu ba aprezenta ba iha STAE kona-ba elementu husi bulletin votu mak hanesan sigla, emblema ou bandeira ne’e mak refere iha lei eleisaun parlamentár”, nia afirma.
Daudaun ne’e, nia afirma hala’o kontaktu ho partidu polítiku sira atu submete bandeira ka emblema mai STAE, hafoin ajusta ba iha modelu bulletin votu.
“Atu tau foto iha bulletin votu ne’e la’ós ami-nia kompeténsia, maibé ha’u atu fó hatane kata kami sei produs bulletin votu tuir lei ne’ebé iha. Daudaun ami prepara hela modelu buletin votu no ami husu ona ba partidu polítiku atu submeter bandeira ho foto, tanba ami haree iha lei ne’e emblema ho ema ne’e tenke ho koloridu, maibé tenke tuir hanesan ho emblema ka bandeira ne’ebé lori halo inskrisaun partidu iha Tribunál Rekursu,” katak.
Notísia relevante:STAE husu partidu polítikus submete atributu prodús buletin votu
Jornalista: Osória Marques
Editór : Florencio Miranda Ximenes
