DILI, 04 abríl 2023 (TATOLI)—Diretór Jerál Sekretariadu Tékniku Administrasaun Eleitorál (STAE), Acilino Manuel Branco, husu eleitór Ataúro atu labele preokupa tanba lista votante prodús naran suku nian.
Notísia Relevante: Komunidade Ataúro maiória hetan difikuldade asesu ba dokumentu
“Ha’u husu komunidade atu lalika preokupa tanba lista votante sei prodús naran suku nian. Tanba mezmu sira balun la atualiza maibé sira kontinua uza kartaun anteriór atu bele ezerse sira-nia direitu votu iha eleisaun parlamentár iha Ataúro, mezmu sira-nia kartaun sei hela ho postu administrativu nian. Naran katak sira tenke ba iha ne’ebá suku nian hodi konfirma naran iha ne’ebá,” Acilino Manuel Branco hateten ba jornalista sira iha STAE, Caicoli, tersa ne’e.
Karik, nia dehan, Prezidente Repúblika José Ramos Horta promulga ona alterasaun lei eleisaun ba parlamentu nasionál mak sidadaun ne’ebé la atualiza nia kartaun, nia bele vota iha sentru paralelu sira iha Dili.
Nia hateten, bainhira Xefe Estadu promulga tarde ne’e iha aspetu balun de’it, ezemplu liga ho jornalista sira hosi mídia privada ne’e mós seidauk tarde, tanba halo ajustamente de’it.
Agora ne’e, nia esplika, tarde mak liga ho sentru paralelu no postál voting, ne’e bele mós atraza uitoan presiza mobiliza rekursu balun tan.
Jornalista : Osória Marques
Editór : Cancio Ximenes
