DILI, 05 abríl 2023 (TATOLI) – Governu aprova projetu dekretu-lei ne’ebé aprezenta husi Ministru Turizmu, Komérsiu no Indústria, José Lucas do Carmo da Silva, ho objetivu atu define medida konjuntu apoia ida ba empreza mikro, ki’ik no médiu.
“Projetu dekretu-lei ne’e ho objetivu atu estabelese kuadru lejizlativu ida ne’ebé define papél Estadu nian iha promosaun no apoiu ba ajente ekonómiku sira setór empreza mikro, ki’ik no média iha Timor-Leste, hodi rekoñese importánsia husi empreza sira ne’e ba ekonomia nasionál”, Ministru Prezidénsia Konsellu Ministru, Fidélis Magalhães, hatete iha Palásiu Governu.
Portavós Ezekutivu ne’e realsa katak konjuntu medida apoiu nian ba empreza refere ne’ebé propoin inklui fasilidade asesu ba kréditu, insentivu ba inovasaun, kriasaun infraestrutura ba inkubasaun empreza no negósiu, formasaun no kapasitasaun emprezariál.
Antes ne’e, Governu kria mós liña kréditu ho naran fasilidade garantia kréditu suave ho objetivu atu promove no estimula emprendedorizmu sosiál no aposta iha projetu inovadór sira hodi permite fortalesimentu emprezariál no industriál nasionál.
Programa kréditu suave ne’e atu kapitaliza no fasilita asesu finansiamentu ba empreza mikro, ki’ik no média sira, liuliu ba emprendedorizmu sosiál no inovasaun iha setór komérsiu, turizmu no indústria.
Nune’e liuhosi programa refere, benefisiáriu bele halo kréditu iha banku hahú husi montante rihun $1 to’o 25, ho juru 3% kada tinan. Ba programa ne’e, dezde 2021 empreza 40 mak sai ona benefisiáriu ba kréditu suave.
Notísia relevante: Governu kria fasilidade garantia kréditu suave
Jornalista: Antónia Gusmão
Editora: Maria Auxiliadora
