DILI, 11 abril 2023 (TATOLI)— Diretór Autoridade Aduaneira (AA/Alfándega), José António Fátima Abílio, hateten, sira-nia parte presiza mini laboratóriu ida hodi halo teste ba produtu importasaun sira.
Nia dehan, Alfándega presiza tebes mini laboratóriu, tanba hotuhotu hatene produtu importasaun sira tama mai ne’e liuhosi pontu entrada sira entaun tenke iha mini laboratóriu hodi halo teste ba produtu sira ne’e atu garante ninia kualidade.
“Ko’alia kona-ba laboratóriu, hanoin instituisaun relevante sira presiza laboratóriu atu garante kualidade ba konsumu nasionál. Maibé ami mós presiza mini laboratóriu ida tau iha pontu entrada sira hodi halo teste ba produtu importasaun sira antes tama mai ita-nia rai,” José António Fátima Abílio dehan ba Agência Tatoli, iha nia-knaar fatin, Palásiu Governu, Dili, tersa ne’e.
Nia dehan, ko’alia kona-ba laboratóriu ne’e importante tebes iha nasaun ida, liuliu instituisaun relevante sira hanesan, Ministériu Saúde (MS), Auatoridade Inspesaun no Fiskalizasaun Atividade Ekonómika, Sanitária no Alimentár, Institutu Públiku (AIFAESA,I.P), Institutu Kualidade Timor-Leste (IQTL, sigla portugés) no sira seluk.
Nia dehan, bainhira laboratóriu laiha, akontese kazu ruma relasiona ho produtu importasaun sira hanesan foin lalais mina Symphoni hakarak ka lakoi atu hatene produtu ida nia kualidade tenke haruka ba nasaun vizinu sira hanesan Austrália no Indonézia mak foin bele hatene ninia rezultadu. Tanba Timor-Leste rasik laiha laboratóriu ne’ebé atu garante halo teste ba produtu sira.
“Ita hotu hatene, daudaun ne’e, MS rasik mak foin iha laboratóriu maibé ida ne’e de’it seidauk bele no instituisaun sira seluk tenke iha hotu laboratóriu nune’e bele garante kualidade konsumu nasionál,” nia dehan.
Nia afirma, Timor-Leste rasik tenke iha laboratóriu nasional ida ne’ebé kualidade, tanba ida ne’e mós kontribui hotu ba TL nia adezaun ba Asosiasaun Nasaun Sudeste Aziátiku (AZEAN) no Organizasaun Mundiál Komérsiu (OMK).
“Kona-ba, exportasaun produtu ne’e ha’u hanoin liuhosi prosesu ida ministériu relevante sira mak foin halo exportasaun. Maibé importasaun ba produtu balu ne’ebé rahun ita la hatene, ezemplu deskonfia aimoruk droga ruma ida ne’e ita presiza teste ruma iha pontu entrada antes lori tama mai railaran,” nia dehan.
Jornalista : Arminda Fonseca
Editora : Armandina Moniz
