DILI, 12 abríl 2023 (TATOLI)–Ministeriu Edukasaun Juventude no Desportu (MEJD), segunda (17/04) semana oin, sei realiza eventu importante rua kona-ba serimónia lansamentu konstrusaun projetu edukativa foun 2023 no inaugurasaun eskola 59 iha Bobonaru no tau prioridade ba prosesu edukasaun pre-eskolár ba futuru ho orsamentu ne’ebé prevee ona millaun $15.
Notísia Relevante: MEJD-BNCTL realiza akordu transferénsia osan ba konstrusaun eskola 117
Diretór Nasionál Dezenvolvimentu Parque Eskolár (DNDPE), Agostinho Soares, hateten eskola 117 ne’ebé sei lansa iha semana ne’e no númeru barak liu mai hosi edukasaun Pre-Eskolár, tanba projetu ne’e sai baze prioridade ba VIII Governu nian ne’ebé konsagra ona iha dekretu-lei jestaun administrasaun ensinu ne’ebé aprova ona iha Konsellu Ministru.
“Ita agora prepara lansamentu daudaun projetu komunitária 117 eskola hodi hein bainhira Prezidente Repúblika promulga ona dekretu-lei ne’e depois publika tiha iha jornál Repúblika funsionamentu ensinu iha 2024 ne’e, sei hahú hosi pre-eskolár,” Diretór DNDPE, Agostinho Soares, hateten ba Tatoli iha ninia kna’ar fatin Vila Verde, kuarta ne’e.
Nia dehan, prioridade boot ba VIII Governu hodi bele realiza programa infraestrutura edukativa ba eskola sira iha territóriu nasionál ne’e, tanba hetan ona mudansa ba lejislasaun ne’ebé ezije ministériu tenke halo buat ruma, atu hadi’a edukasaun iha Timor-Leste liuhosi ninia konstrusaun fíziku sira, atu nune’e bele garante prosesu ensinu aprendizajen ida ho adekuadu ba estudante sira iha territóriu Timor laran tomak.
“Ha’u bele dehan kurríkulu ida agora iha diferensa ho kurríkulu anteriór tanba ne’e mak akontese mudansa ba lejislasaun, MEJD ajusta kedan ninia planu no programa hodi tau prioridade ba projetu komunitária hosi 2023 ba oin ho númeru boot liu iha edukasaun Pre-Eskolár,” nia dehan.
Nia afirma, iha loron 17 abríl 2023 tuir kalendáriu ne’ebé fiksu ona sei akontese eventu rua ne’ebé importante kona-ba lansamentu konstrusaun projetu edukativa foun 2023 no serimónia inaugurasaun projetu 59 ne’e hetan ona aseitasaun hosi Primeiru-Ministru, Taur Mata Ruak, no sei realiza iha prosima semana iha munisípiu Bobonaru.
Iha tempu dadeer sei iha atividade inaugurasaun faze daruak depois parte lorokraik sei iha serimónia lansamentu konstrusaun projetu edukativa foun 2023.
Eskola 59 ne’ebé tama ona lista inaugurasaun ne’e barak liu mai hosi projetu komunitária inklui kapitál dezenvolvimentu, signifika iha eskola 57 mai hosi projetu komunitária no projetu kapitál dezenvolvimentu iha rua (2).
Hosi projetu 59 ne’ebé sei inaugura iha tempu besik ne’e, kuaze 57 hosi eskola ensinu báziku mak barak depois tuir edukasaun Pre-Eskolár.
Ho nune’e, sei hela projetu hamutuk 60-resin mak iha hela prosesu nia laran no tuir previzaun ne’ebé Dirasaun deside ona katak sei hela ba faze ikus.
Tuir kalkulasaun, antes juñu nia rohan bele konklui ona tanba projetu eskola 60-resin ne’e ninia kakuluk taka hotu ona, hela de’it arus, janela no odamatan mak seidauk monta tanba kondisaun Estrada aat difikulta transporte sira atu tula materiál ba mai.
“Ita orienta nafatin ba grupu komunitária no supervizór sira iha terrenu atu nafatin akompaña situasaun iha terrenu kuandu udan-been menus ona bele aselera lalais projetu ne’e,” nia dehan.
Enkuantu hosi totál projetu 228, ne’ebé Ministériu Edukasaun Juventude no Desportu define ona iha tinan kotuk kuaze eskola 94 hetan ona inaugurasaun iha janeiru tinan ne’e no agora sei kontinua inaugurasaun tan projetu 59 iha tempu besik.
Jornalista : Tomé Amado
Editór : Cancio Ximenes
