COVALIMA, 21 abríl 2023 (TATOLI)–Prezidente Partidu Nasionál Dezenvolimentu (PDN), Lucas Soares Coli Bere, promote bainhira iha eleisaun parlamentár 2023 ne’e povu fó konfiansa ba PDN kaer ukun, mak PDN sei fó prióridade ba programa hadi’a ekonómia povu no hadi’a infraestrutura iha postu administrativu Maucatar, munisípiu Covalima.
Notísia Relevante: PDN tau prioridade ba setór 10 bainhira hetan fiar hosi povu
“Partidu Dezenvolvimentu Nasionál (PDN) fó prióridade hodi haree povu nia-moris, oinsa luta atu hasai povu husi mukit hodi hetan justisa liuhosi programa prióridade hadi’a ekonómia hodi prepara sira nia-oan ba futuru no hadia infraestrutura iha Covalima,” Prezidente Partidu PDN, Lucas Soares Coli Bere, hato’o programa ne’e liuhosi kampaña daruak ho tipu door-to-door hodi halo diálogu ho komunidade iha postu administrativu Maucatar, munisípiu Covalima, sesta ne’e.
Prezidente ba partidu ho númeru sorteiu primeiru ne’e hateten, razaun fó prióridade ba programa ekonómia hodi defende osan hosi fundu mina-rai ne’ebé povu sira iha direitu, tanba atu luta ba soberania liberta rai hodi hetan moris di’ak povu hodi haree sira-nia kondisaun loro-loron.
“Liuhosi hadi’a ekonómia oinsa mak bele prepara sira nia-oan ba futuru hanesan setór edukasaun, saúde no ba atividade agrikultura sai priórdade ba ita hodi dezenvolve ekonómia ba ita nasaun hodi garante futuru ida di’ak,” nia dehan.
Alende hadi’a ekonomia no infraesrutura, PDN iha programa prióridade seluk hanesan agrikultura, edukasaun, saúde, ekonómia tau osan iha Banku Nasionál Komérsiu Timor-Leste (BNCTL) nune’e povu-sira bele asesu kreditu hodi hadi’a sira- nia moris liuhousi ekonómia prepara ba sira-nia oan ba futuru.
Sekretáriu Jerál Partidu Nasionál (PDN), João Freitas da Camara, hateten povu fó konfiansa iha eleisaun parlamentar, Partidu Nasionál Dezenvolvimentu (PDN) sei identifika programa prióridade hosi povu hodi defende interrese Munisípiu Covalima iha área prióridade.
“Ami sei identifika problema hosi povu hanesan badahuluk estrada aat povu labele lori produtu faan iha merkadu no Estadu la halo estudu didi’ak implementa PMOPA hodi hadi’a estrada la haree didi’ak povu nia nesesidade,” nia hateten.
PDN ho númeru sorteiru primeiru ne’e kompromete ba povu bainhira fó fiar iha eleisaun, sei identifika povu nia problema liuhosi kada postu administrativu nune’e bele atende povu ho di’akliu.
“Povu fó konfiansa ba PDN kaer ukun mak sei identifika problema ne’ebé povu enfrenta kada postu administrativu ne’ebé pertense ba munisípiu Covalima, nune’e ami bele atende di’akliu. Ami hakarak povu rasik mak hato’o sira-nia problema prióridade sira,” nia dehan.
Hafoin PDN finaliza kampaña ho tipu door-to-door iha postu administrativu Maucatar, bazea ba kalendáriu hosi Komisaun Nasionál Eleisaun (CNE-sigla portugés), Partidu Dezenvolvimentu Nasionál kontinua hala’o kampaña tipu doo-to-door, iha postu administrativu Suai, munisípiu Covalima.
Jornalista : Celestina Teles
Editór : Cancio Ximenes
