DILI, 24 abríl 2023 (TATOLI) – Eskola Bázika Filiál (EBF) Bebonuk implementa ona Programa Merenda Eskolár ba alunu hamutuk 1.062 ho osan montante $28.564. Programa ne’e hahú, entre abríl no dezembru.
Koordenadór EBF Bebonuk, Felisberto da Cruz, hatete implementasaun merenda eskolát tinan ne’e tarde.
“Ita-nian eskola rasik foin mak hahú programa ne’e iha 05 abríl 2023, maibé agora eskola feriadu entaun ita sei hahú fali iha 02 maiu. Ita iha de’it fulan ualu ba implementa programa merenda eskolár ne’e”, dirijente ne’e dehan ba Tatoli, iha Bebonuk, segunda ne’e.
Programa Merenda Eskolár ne’ebé implementa iha EBF Bebonuk ne’e hetan apoiu orsamentu hosi Ministériu Administrasaun Estatál (MAE) liuhosi Autoridade Munisípiu Dili. Verba ba programa ne’e fahe ba item rua – ba alunu 1.062 sei hetan $23.788 no ba grupu Ekipa Jestaun Programa (EJP) sei hetan $4.757.
“Orsamentu ne’ebé prevee ona ba ita-nian estudante sira ne’e kada loron ema ida sei han sentavu 0,35, hahú hosi segunda to’o sesta. Ho totál estudante 1.062 ne’e kada loron sei han hamutuk $371”, nia esplika.
Osan ba grupu EJP na’in-haat ne’ebé apoiu programa ne’e, kada loron gasta $74,34 hodi prepara merenda eskolár ba estudante sira, nune’e ba fulan ualu nia laran sira sei gasta hamutuk $4.757.
“Orsamentu hamutuk $28.564 ne’ebé uza ba Programa Merenda Eskolár ne’e, kada loron sei hasai sentavu 0,42 no programa ne’e rasik sei implementa tuir loron efetivu 64. Merenda eskolár ba tinan ida ne’e diferente ho tinan sira anteriór, tanba Governu entrega ba grupu EJP sira maka organiza no hetan akompañamentu hosi profesór sira atu nune’e bele aselera liután ninia efetividade sira” katak.
Razaun Ezekutivu entrega programa ne’e ba grupu EJP sira mak organiza atu labele prejudika profesór sira ninia atividade iha prosesu aprendizajen ba estudante sira.
Lembra katak Governu aloka, iha tinan, ne’e millaun $15 ba kada munisípiu hodi halo jestaun ba merenda eskolár iha territóriu.
Notísia relevante: Edukasaun Dili lansa merenda eskolár ba estudante rihun 49-resin
Jornalista: Tomé Amado
Editora: Maria Auxiliadora
