DILI, 28 abríl 2023 (TATOLI)—VIII Governu iha tinan 2020 to’o abríl 2023 konsege halo poupansa osan biliaun $1,4 hosi totál biliaun $5,2 levantamentu Fundu Minarai ne’ebé mak Parlamentu Nasionál aprova ona durante tinan-haat ikus.
“Poupansa ne’e akontese tamba Ministériu Finansa aplika jestaun fluxu kaixa ka cash flow, ne’ebé bainhira iha nesesidade atu halo reforsu ba kaixa Estadu mak Governu foin hato’o pedidu levantamentu osan ba Banku Sentrál Timor-Leste, maibé bainhira laiha nesesidade, Governu sei la halo levantamentu,” relata nota ne’ebé Agência Tatoli asesu, sesta ne’e.
Parlamentu Nasionál iha tinan 2020 aprova levantamentu osan hosi Fundu Minarai ho montante millaun $964 no Governu halo de’it levantamentu millaun $886 ka 92%. Iha 2021 aprova levantamentu biliaun $1,378 no Governu foti de’it biliaun $1,148 ka 83%.
Notísia relevante
Enkuantu, iha tinan 2022, Parlamentu Nasionál aprova levantamentu osan hosi Fundu Minarai ho montante biliaun $1,553 no Governu foti de’it biliaun $1,404 ka 90%. Iha ne’e, aprova levantamentu osan biliaun $1,346 no to’o iha abríl 2023, Governu foin mak foti de’it millaun $300 ka 22%.
Nune’e, Governu liuhosi Ministériu Finansa, hosi tinan 2020 to’o abríl 2023 halo ona levantamentu biliaun $3,7, ne’ebé hosi montante biliaun $5,2 ne’ebé aprova ona, iha poupansa biliaun $1,5, entre levantamentu aprovadu biliaun $5,2 no levantamentu atuál biliaun $3,7.
Tuir relatóriu hosi Banku Sentrál Timor-Leste, to’o loron 31 dezembru 2022, balansu Fundu Minarai hamutuk biliaun $17,4.
Jornalista : Antónia Gusmão
Editora : Julia Chatarina
