DILI, 08 maiu 2023 (TATOLI) – Partidu Kongresu Nasionál Rekonstrusaun Timor-Leste (CNRT) husu Governu atu rezolve lalais problema pasaporte tanba kestaun ne’e hamosu ona impedimentu ba traballadór timoroan na’in-30 labele bá serbisu iha Austrália.
Portavós no Koordenadór Polítika Esterna Partidu CNRT, Roberto Soares, afirma katak durante ne’e partidu akompaña problema pasaporte ne’e no sente triste tebes. Tanba ne’e, CNRT hato’o lamentasaun boot ba kazu ne’ebé akontese iha semana kotuk ligadu ho kanselamentu viajen ba traballadór 30 tanba de’it pasaporte kaduka ona.
“CNRT hato’o nia solidariedade ba traballadór sira ne’ebé la konsege bá serbisu iha Austrália. Ami kontinua ezije ba autoridade kompetente sira, liuliu VIII Governu Konstitusionál atubele foti medida ho lalais hodi bele solusiona problema sira ne’e atu traballadór seluk ne’ebé sei mai labele sai vítima hanesan ba asuntu ne’e”, Roberto Soares hatete iha konferénsia imprensa ne’ebé hala’o iha Bairro dos Grilhos, segunda ne’e.
Portavós ne’e haktuir katak CNRT lamenta ho kauza ne’e tanba loloos ne’e Governu tenke fó prioridade ba asuntu ne’ebé preokupante tebes ba ema hotu. Tanba kestaun pasaporte ne’e sai problema ida ba nasaun no ba povu.
“Faktu kontinua hatudu katak vítima ba kazu ida ne’e aumenta kada loron ba loron. Haree ba problema sira ne’e hotu maka partidu konsidera traballadór sira sai vítima ba Ezekutivu ne’ebé laiha vizaun, koñesimentu no rekoñesimentu ba esforsu traballadór sira seluk ne’ebé atu sai hosi nasaun ne’e hodi bá buka osan iha ema nia rain, nune’e bele sustenta sira-nia família tanba daudaun Timor-Leste laiha kondisaun no serbisu atu sustenta sira-nia moris”, afirma.
Partidu refere promete katak problema pasaporte sei sai duni asuntu importante ba ajenda prinsipál partidu bainhira kaer ukun. “Sei konvoka enkontru ho ministériu relevante sira hanesan Justisa, Edukasaun, Negósiu Estranjeiru no Kooperasaun no Sekretaria Estadu Formasaun Profisionál no Empregu atu trata asuntu ne’e ho urjénsia hodi bele responde ba situasaun ne’ebé ligadu ho pasaporte ne’ebé agora daudaun prejudika imajen Timor-Leste nian iha mundu”, realsa.
Tanba ne’e CNRT husu ba militante no simpatizante sira hotu atu serbisu maka’as hodi konvense povu hodi vota ba CNRT, nune’e bele hadi’a fali sistema sira ne’ebé la’o ladi’ak iha nasaun ida ne’e.
Notísia relevante: Ministru Justisa kontinua promete tempu badak empreza fornese kaderneta pasaporte
Jornalista: Tomé Amado
Editora: Maria Auxiliadora
