DILI, 26 abríl 2023 (TATOLI)–Ministru Justisa, Tiago Amaral Sarmento, promete tempu badak empreza Thales internasionál sei hatama kaderneta pasaporte eletróniku Timor-Leste tanba Governu rezolve ona prosesu lubuk ida hanesan selebra kontratu no halo pagamentu.
“Progresu kona-ba pasaporte eletróniku Timor-Leste nian, iha loron 13 abríl 2023 halo ona aprovasaun kaderneta pasaporte no seguransa pasaporte. Prosesu ne’e hahú hosi fevereiru 2023 mak mai. Bainhira iha 26 janeiru dekretu-lei kona-ba ezekusaun orsamentu promulga, Ministériu Justisa halo reuniaun kedas ho empreza Thales internasionál hodi halo prosesu tuir lei aprovizionamentu Timor-Leste no ajusta direta,” Ministru informa iha Palásiu Governu, kuarta ne’e.
Notísia relevante : Ministru Justisa deside empreza Visi Mitra no Thales halo produsaun ba pasaporte
Ministériu Justisa halo esforsu ona atu tempu badak kaderneta pasaporte ne’ebé empreza imprime iha Finlándia bele to’o ona.
“Stoke pasaporte mós kuaze laiha ona no ita presiza aselera prosesu pasaporte, entaun ami koordena nafatin ho empreza Thales para sira halo esforsu ida atubele imprime hodi fornese pasaporte lalais. Prosesu imprime pasaporte liuhosi faze lubuk hanesan asina kontratu no kompromisu, halo pagamentu, aprovasaun ba modelu, seguransa, no faze tuir mai sira bele imprime no bele fó ona mai ita,” nia akresenta.
Ministériu Justisa nafatin halo koordenasaun ho empreza fornesedór no sira aseita tenke aselera prosesu tanba rezolve ona prosesu legál sira.
Provizóriamente Governu hakarak simu uluk kaderneta pasaporte 16.000 hodi atende situasaun agora tanba ema barak presiza urjénsia. Tanba iha ona akordu entre Governu ho empreza entaun responsável garante katak sira sei aselera prosesu no fornese kaderneta.
Orsamentu ne’ebé prevee hodi halo produsaun kaderneta pasaporte ho motante $212.000.
Jornalista : Antónia Gusmão
Editora : Julia Chatarina
