MANATUTO, 08 maiu 2023 (TATOLI)—Partridu Dezenvolvimentu Nasionál ho númeru sorteiu 1 ne’ebé lideradu hosi Lucas Soares Colibere, sábadu (06 maiu 2023) ne’e, labele realiza sira-nia atividdade kampaña eleitorál iha postu administrative Soibada, munisípiu Manatuto, tanba la estabelese estrutura PDN iha postu no munisípiu.
Notísia Relevante: PDN defende família mártir no hasa’e saláriu ba konsellu suku
Diretór Komisaun Nasionál Eleisaun (CNE) munisípiu Manatuto, Paulino Soares, husu ba partidu polítika sira-ne’ebé atu halo kampañia mak nia estrutura munisípiu ka postu laiha hodi labele realiza tenke infoma antes ba CNE munsipál, nune’e labele halo kolen CNE-PDHJ-sosiedade sivíl halo monitorizasaun.
“Kuandu partidu nia emar iha baze laiha lalika tau kalendáriu, nune’e labele halo kolen CNE, PDHJ, sosiedade sívil ne’ebé durante ne’e monitoriza no mídia ne’ebé la’o tuir hodi halo kobertura. Se laiha estrutura iha baze ne’e tenke informa antes, nune’e ami bele hatene. Labele to’o tiha fatin, depois ami telefone tan ba dirijente partidu mak foin fó resposta katak partidu ne’e labele hala’o kampaña iha fatin ida-ne’e. Envezde, laiha ne’einforma ami, lae ami mak buka tan,” Diretór CNE ne’e hateten ba Agência Tatoli liuhosi telefónika, segunda ne’e.
Nia husu nafatin ba partidu polítika sira atu informa antes ba CNE no parte seguransa, bainhira la realiza sira-nia atividade kampaña eleitorál iha postu ka suku balun iha Manatuto nian.
“Importante mak informa ba seguransa no CNE, nune’e bele anota hela. Labele loron atu halo mak laiha fali, no nein informasaun ruma hosi partidu polítika sira. Ha’u ko’alia ida-ne’e tanba iha sábadu (06 maiu 2023) ne’e loloos PDN halo kampaña iha Soibada maibé la realiza. Tanba dehan nia emar iha estrutura postu ne’ebá mak laiha. Ami telefone ba sira mak sira dehan sira-nia emar mak laiha,” nia dehan.
Diretór CNE ne’e hateten, ida-ne’e CNE nafatin tau iha relatóriu no subemte ba nasionál, nune’e bele bolu atensaun ba sira.
Jornalista : Osória Marques
Editór : Cancio Ximenes
