MALIANA, 16 maiu 2023 (TATOLI) – Sekretariadu Tékniku Administrasaun Eleitorál (STAE) Munisípiu Bobonaro, deside aluga viatura hamutuk unidade 30-resin atu transporta materiál eleisaun parlamentár ba sentru votasaun no estasaun votu.
Diretór STAE Munisípiu Bobonaro, Mariano Viegas Amarál, esplika viatura ne’ebé presiza hamutuk 52 ho kategoria tolu komposta hosi, viatura estadu iha munisípiu Bobonaro, apoia hosi nasionál no aluger.
Notísia relevante:STAE Bobonaro konklui verifikasaun ba boletín votu kaixa 15
“Ita agora preparadu aluga viatura hamutuk 32 hosi nasionál mak seidauk fiksu, iha munisípiu nia mak ita iha 21,” nia informa ba jornalista sira iha Maliana, segunda ne’e.
Diretór Mariano hatutan, viatura hirak-ne’ebé sei konsentra hotu iha edifísiu STAE munisípiu Bobonaro atu halo pasa-revista ba nia kondisaun inklui motorista sira atu transporta materiál hirak-ne’e to’o fatin destinasaun ho susesu.
“Kada viatura ida sei tula materiál sensitivu no naun-sensitivu sentru rua ninian,” nia katak.
Totál sentru votasaun (CV, sigla portugés) iha munisípiu Bobonaro hamutuk 150 no estasaun votasaun (EV, sigla portugés) hamutuk 170.
Entretantu totál eleitór munisipiu Bobonaro ne’ebé elijível atu vota iha eleisaun parlamentár fulan ne’e hamutuk 72.537, komposta hosi mane 37.335 (51%) no feto 35.202 (49%).
Notísia relevante: STAE Bobonaro identifika estrada ba sentru votasaun 36 presiza hadi’a
Jornalista: Sérgio da Cruz
Editór: Evaristo Soares Martins
