iklan

ERMERA, MUNISÍPIU

PDC: Dezenvolvimentu seitór turizmu-agrikultura kore dependensia ba mina no gas

PDC: Dezenvolvimentu seitór turizmu-agrikultura kore dependensia ba mina no gas

Imagem Tatoli/Filomeno Martins

ERMERA, 18 maiu 2023 (TATOLI)Partido Democrata Cristão (PDC) iha kampaña eleitorál ikus iha Suku Era-ulu, Postu Administrativu Letefoho, Munisípiu Ermera kompromete, sei dezenvolve seitór turizmu no agrikultura atu kore dependensia Timor-Leste nian ba seitor mina no gas.

Lider máximu PDC, Francisco de Aráujo hato’o katak durante ne’e Estadu depende liu ba mina ho gas: “Signifika katak aban bainrua, bainhira mina no gas laiha ona, ita lori saida mak bele sustenta ita-nia governasaun.”

Líder polítiku ne’e dehan tanba ne’e mak tempu to ona atu tau prioridade ba seitór turizmu liu-liu fatin turístiku sira iha rai laran.

“Tempu to ona atu governu labele depende de’it ba seitór mina ho gas maibé persiza dezenvolve seitór produtivu hanesan turizmu,” Prezidente PDC, Francisco de Aráujo hato’o kompromisiu polítiku ne’e ba militante no simpatenzante iha munsípiu Ermera, kinta ne’e.

Nia informa katak bainhira povu fó fiar, sei tau mós prioridade hodi dezenvolve Lagoa Era-ulu sai fatin turístiku.

Francisco dehan se lagoa Era-ulu dezenvolve ho di’ak sei lori rendimentu ba Estadu iha futuru.

“Fatin Lagoa Era-ulu ne’e iha poténsia atu dezenvolve sai turizmu lokál. Entaun, Estrada tenke di’ak, ita mós tenke fasilita hotel, no restaurante ruma atu nune’e ema mai karik labele buka fali ai-han ruma atu han,” Francisco esplika.

Líder polítiku ne’e hateten governu mós persiza tau prioridade ba dezenvolvimentu seitór agrikultura.

Nia dehan persiza halo transformasaun ba Sistema agrikultura iha Timor-Leste atu nune’e labele depende bebeik ba sistema agrikultura tradisionál hanesan uza besi no insada hodi halo toos.

“Ita labele depende bebeik ba povu sira atu lori besi no insada halo toos. Siginifka, ita halo toos ida sei latoo ektare ida ka rua tanba ita-nia forsa lato’o. Entaun, ita nia hakarak ba future ne’e mak, tenke halo ona serbisu ho mákina modernu ida ne’ebé mak bele prodúz no kolleta,” Francisco salienta.

Nia haktuir tan, atu dezenvolve seitór agrikultura, bainhira fahe trator hodi kee rai, governu persiza halo manutensaun ba ekipamentu sira hodi asegura ninia sustentabilidade.

Entretantu, PDC mós kompromete sei estabelese desentralizasaun póder lokál bainhira kaer ukun iha IX Governu.

 

Jornalista: Filomeno Martins

Editora: Nelia Borges

iklan
iklan

Leave a Reply

iklan
error: Content is protected !!