Povu Oé-Cusse nia esperansa ba Governu foun “implementa promesa kampaña”
OÉ-CUSSE, 21 maiu 2023 (TATOLI) – Komunidade sira iha suku Usitasa’e, sub-rejiaun Oésilo, Rejiaun Administrativa Espesial Oé-cusse Ambeno (RAEOA), espera partidu ne’ebé sai vensedór hodi lidera nonu Governu tenke implementa programa sira-ne’ebé promete ona ba povu durante períodu kampaña eleitorál.
Notísia relevante: PR Horta husu líder partidu polítiku simu rezultadu eleisaun parlamentár
Votante Apolinário Liub, hatete, durante ukun-aan to’o tinan 21 ona, nu’udar povu nafatin terus, susar tebes atu asesu ba estrada ho di’ak, bee-moos, no fasilidade saúde, infraestrutura bázika sira-ne’e importante tanba benefísia direita ba povu liuliu iha área rurál.
Tuir nia observasaun, durante iha períodu kampaña, nia rona ona programa barak aprezenta hosi partidu sira hotu, nune’e nia espera iha futuru karik partidu ida lidera Governu, tenke implementa programa ne’ebé hato’o ona ba povu.
“Hanesan ohin ami vota ona, kumpri ha’u-nia devér nu’udar sidadaun Timorense, ami-nia esperansa ba nai-ulun sira, mak ne’e sei karik partidu ida-ne’ebé maka manán iha eleisaun parlamentár ne’e, hodi lidera Governu foun mai, tenke tau matan ba povu nia moris, realiza programa ne’ebé maka hato’o ona iha kampaña,” Votante Apolinário Liub, ko’alia hafoin ezerse direitu votu iha sentru votasaun Pune, Usitasa’e, domingu ne’e.
Nia hatutan, kada tinan lima nia laran, povu vota nafatin, maibé dezenvolvimentu nafatin laiha mudansa, entaun votu ne’e importante atu determina nasaun nia futuru, maibé povu nafatin halerik ba buat hotu-hotu.
“Ami-nia sentimentu ba futuru atu kaer ukun, ami husu de’it hadi’a estrada sira, dada bee-moos, sekuandu ita ukun la haree povu, kada tinan lima povu nafatin terus, dezde uluk to’o agora, ida-ne’e, maka ami-nia esperansa ba Governu foun mai,” nia husu.
Notísia relevante: Taur prontu simu rezultadu saida de’it povu fó iha eleisaun parlamentár
Votante Alcino Quelo, haktuir, setór edukasaun mak importante, nune’e husu Governu tenke lori eskola besik ba komunidade, no hadi’a kondisaun sira.
“Ha’u nudar povu, ohin ha’u hili tiha ona, maibé ha’u husu líder na’in-sira iha partidu hotu, sekuandu aban bairua, semak mak ukun, tenke haree povu ida-ne’e, tanba ami iha área rurál, ami-nia estrada seidauk di’ak, susar tebes asesu bee-moos, hadi’a eskola sira, tenke lori eskola ba besik ba komunidade, setór edukasaun mak importante liu, tanba ita-nia oan sira presiza eskola besik, lakohi ba dook,” nia katak.
Nune’e mós votante, Jacinto Poto, “durante ne’e kampaña partidu polítiku sira mai hato’o sira-nia programa hato’o kompromisu ba ami povu, entaun bainhira kaer Governu bele implementa programa sira-ne’ebé hato’o ona iha tempu kampaña,” nia katak.
Tanba durante ne’e tuir nia haree, nu’udar komunidade konsumu ona programa barak hosi partidu sira, maibé bainhira ukun, haluha tiha programa sira-ne’ebé promete ona ba povu.
“Ne’ebé ha’u espera katak, Governu foun mai, hosi partidu ne’ebé de’it mak lidera, entaun tenke implementa programa, no tau matan ba povu,” ni fó hanoin.
Entretantu, totál sentru votasaun ne’ebé estabelese iha territóriu Oé-Cusse Ambeno hamutuk 80 no estasaun votasaun 115, ho totál eleitór elijível atu partisipa eleisaun iha loron 21 fulan maiu tinan 2023 hamutuk 54.291, mane 27.681 no feto 26.610.
Notísia relevante: ElPar 2023 : Fiar CNRT sei manán, Xanana: joven labele provoka malu
Jornalista: Abílio Elo Nini
Editór: Evaristo Soares Martins
