DILI, 21 maiu 2023 (TATOLI)—Prezidente Repúblika (PR), José Ramos Horta, husu líder partidu polítiku sira hotu atu simu rezultadu saida de’it povu fó iha eleisaun parlamentár tinan 2023.
Notísia Relevante: Taur prontu simu rezultadu saida de’it povu fó iha eleisaun parlamentár
“Ha’u hatene no fiar líder sira hotu-hotu ho líder sira-nia reprezentante iha fatin hotu-hotu, ha’u-nia apelu kalma, dixiplina, hatudu partidu sira-nia maturidade, respeitu povu nia direitu soberanu atu vota no rezultadu mai ita hotu-hotu simu de’it,” PR Horta hato’o apelu ne’e ba jornalista sira hafoin ezerse direitu votu iha fatin votasaun iha Metiaut, Dili, domingu ne’e.
Nia hatutan, ne’e rezultadu ne’ebé mai hosi povu, povu simples, povu ne’ebé nia poder iha mak kada tinan lima, nia ezerse poder ida-ne’e, nia mak hili, ne’eduni hotu-hotu kumprimenta ho di’ak mak povu bele vota ho hakmatek moris ba oin.
Xefe Estadu ne’e hateten, fiar líder polítiku sira kontribui klima dame iha rai-laran no klima domin labele iha ódiu, no sé mak manán ho umildade no sé mak lakon simu ho dignidade.
Bainhira laiha maiória absoluta partidu mais votadu tenke buka kedas partidu ida ka rua forma koligasaun ida post eleitorál, hodi bele hetan maiória Parlamentu tanba programa no orsamentu atu liu iha Parlamentu tenke iha maiória iha Parlamentu atu aprova.
Prezidente Repúblika iha esperansa ba partidu polítiku hamutuk 17 ne’ebé kompete iha eleisaun parlamentár ne’e, sé mak hetan fiar hosi povu bele implementa programa sira ba moris di’ak povu nian.
Notísia Relevante: ElPar 2023 : Fiar CNRT sei manán, Xanana: joven labele provoka malu
“Ha’u hatene no fiar lidér polítiku sira, ita mehi, ambisaun planu atu governa. Purtantu, líder polítiku mak tenke númeru ida halo apelu ba kalma no respeitu malu ba simu rezultadu ne’ebé mai hosi eleisaun ida-ne’e, povu nia direitu soberanu atu hili líder sira. Povu ne’ebé ki’ak no loro-loron terus mehi atu hetan vida di’ak, sira espera Governu ida matenek ho vizaun,” nia hateten.
Nune’e, nia iha esperansa ba partidu ne’ebé hetan fiar hosi povu ho vizaun atu ekonómia bele la’o ba oin, hatun ki’ak no fó atensaun liu ba kosok-oan no inan ho ferik no katuas sira, kria empregu ba joven sira, oportunidade di’akliu ba joven sira ba estuda, halo desportu, prátika kultura no seluk tan.
Xefe Estadu mós hato’o parabéns ba ekipa STAE, CNE, PNTL, F-FDTL no autoridade sira hotu-hotu iha ne’e serbisu makaas hodi realiza eleisaun parlamentár 2023 ne’e.
Notísia Relevante: Lú Olo garante rezultadu eleisaun sei lori vitória ba FRETILIN
Jornalista : Nelson de Sousa
Editór : Cancio Ximenes
