DILI, 29 maiu 2023 (TATOLI) – Xefe Sentru Saúde Vera Kruz, Marilia Piedade, hateten iha fulan abril, Sentru Saúde Vera Kruz rejsita kazu dengue hamutuk 17.
“Durante fulan abril ne’e ita rejista kazu dengue hamutuk 17, husi ne’e afeta ba labarik tinan lima mai kraik no mós ema boot sira”, Marilia Piedade hateten ba jornalista sira iha nia kna’ar fatin Sentru Saúde Vera Kruz, ohin.
Nia dehan, husi kazu dengue ne’e la’os Vera Kruz de’it mak baixa maibé pasiente sira mai husi Sentru Saúde iha Dili laran hanesan Comoro no Becora Formoza.
Iha Sentru Saúde Vera Kruz, ita rejista pasiente dengue hamutuk 17 maibé pasiente ne’ebé trasnferénsia husi Sentru Saúde iha Dili laran ne’ebé mak baixa iha Vera Kruz hamutuk 150 pasiente”, nia esplika.
“Bainhira ami halo tratamentu iha ne’e mak pasiente sira grave ho dengue, entaun ami halo transferénsia ba Hospitál Nasionál Guido Valadares hodi halo tratamentu kontinu husi espesialista sira”, nia subliña.
Nia husu ba inan aman sira tenke halo prevensaun ba moras dengue tanba udan monu rai no foer barak mak kria susuk atu moris iha ne’eba.
“Husu ba komunidade tomak ba prevensaun dengue ne’e importante tanba ne’e tenke limpeza uma oin bairo sira atu evita moras ne’e afeta ba ita-nia oan sira”, nia konklui.
Jornalista : Felicidade Ximenes
Editór : Zezito Silva
