VIQUEQUE, 29 maiu 2023 (TATOLI)–Polísia Nasionál Timor-Leste (PNTL) munisípiu Viqueque detein sidadaun na’in-10 hosi nasaun Indonézia iha área Viqueque Vila, munisípiu Viqueque, ohin maizumenus tuku 12:00 meiu dia.
“Timor-Leste la fó limitasaun ema estranjeiru mai vizita tanba ita iha relasaun bilaterál ho Indonézia, nune’e sidadaun país rua tama sai livre, maibé presiza hatene objetivu sidadaun sira nian. Ami tenke haree sira-nia pasaporte tanba tuir ita-nia lei, pasaporte turista labele halo negósiu. Ohin ita detein sidadaun Indonézia na’in-10 ne’ebé tama Viqueque halo negósiu fa’an korente, kadeli no seluk tan,” Komandante PNTL munisípiu Viqueque, Superentendente Sebastião Alves Quintão, informa iha ninia knaar fatin, Beskem, segunda ne’e.
Notísia relevante : Polísia detein sidadaun Indonézia na’in-lima iha Baucau
Nune’e, parte Polísia halo ona identifikasaun ba ema estranjeiru hirak ne’e no sei kontaktu parte imigrasaun hodi lori fila bá sira-nia rain.
“Ohin ha’u husu sidadaun Indonézia sira ne’e, sira tama mai Timor la fó koñesimentu ba autoridade seguransa sira iha Dili, sira to’o horikan mai Viqueque. Tanba ne’e ha’u la autoriza sira halo negósiu iha Viqueque,” nia hato’o.
Polísia kaptura sidadaun hirak ne’e ho motorizada 10 no daudaun halo hela investigasaun.
“Ami koordena ona ho parte imigrasaun atu aselera prosesu deportasaun sidadaun Indonézia sira-ne’e,” nia akresenta.
Jornalista : Vitorino Lopes da Costa
Editora : Julia Chatarina
