RAEOA sei harii pre-eskolár iha aldeia 63 hodi redús traballu infantíl
OÉ-CUSSE, 02 juñu 2023 (TATOLI) – Autoridade Rejiaun Administrativa Espesiál Oé-Cusse (RAEOA), sei esforsa konstrui eskola 63 iha nível aldeia sira hodi redús kazu traballu infantíl.
Notísia relevante: INDDICA preokupa labarik barak hosi Oé-Cusse fa’an sasán iha Dili
Adjuntu Prezidente Autoridade RAEOA, Maximiano Neno, esplika, situasaun konstestu iha Timor-Leste, labarik barak seidauk eskola, balu eskola maibé laiha kontinuasaun to’o remata, no labarik barak inan-aman uza hodi tulun serbisu iha família.
Liuliu servisu todan, maibé tuir loloos seidauk bele envolve labarik iha situasaun ne’e, maibé Governu no Estadu kontinua halo esforsa atubele fó solusaun ba problema ne’e.
“Autoridade RAEOA durante ne’e mós halo ona esforsa lubuk, inklui planu autoridade nian atu, harii eskola pré-eskolár 63 iha aldeia 63 kabe ba suku 18, agora daudaun ne’e ita kontrui ona, eskola 14, entaun restante ne’e iha ona planu ba fazeadamente bele halo to’o 63, ida-ne’e nia objetivu atu redús kazu infantíl mós,” Maximiano Neno, ko’alia iha Oé-Cusse, kinta ne’e.
Notísia relevante: CNCTI rekomenda autoridade RAEOA hamatan ba labarik sira hosi Oé-Cusse
La’ós ba de’it pré-eskolár maibé reabilita mós ensinu báziku filiál no sentrál sira, intermu infraestrutura inklui mobiliáriu, bee-moos, nune’e fasilita estudante sira-bele eskola ho dignu.
“Autoridade kontinua halo esforsa ida-ne’e, agora ita iha ona situasaun fim do mandatu VIII Governu Konstitusionál, maibé ida-ne’e la’ós impedimentu ba Governu no Estadu Timor-Leste atu para, maibé prosesu dezenvolvimentu sei kontinua la’o nune’e bele kontinua programa sira-ne’ebé planea ona antes,” nia afirma.
Nune’e karik hamosu planu no programa foun maibé sei kontribui hodi tulun hasa’e to’o atinje meta ne’ebé Governu Timor-Leste trasa ona.
Autoridade ne’e rekoñese traballu infantíl, labarik barak hosi Oé-Cusse, barak fa’an sasán iha Dili, maibé nu’udar Governu Rejionál, kria kondisaun, maibé depende konsiénsia hosi família no inan-aman.
Notísia relevante: CNCTI submete ona planu asaun nasionál traballu infantil ba MKAE
Jornalista: Abílio Elo Nini
Editór: Evaristo Soares Martins
