VIQUEQUE, 07 juñu 2023 (TATOLI)–Abitante hamutuk ho lian-na’in hosi suku Luca, postu administrativu Viqueque Vila, munisípiu Viqueque, ho inisiativa halibur osan hodi halo sermónia kulturál ba mota Welolo ne’ebé konsidera kada tinan fó ameasa beibeik ba abitante bainhira halo movimentu.
Lian-na’in hosi aldeia Uma-boot iha suku Luca, Estevão Castilo, hateten, uluk empreza ne’ebé halo ponte Welolo husu lian-na’in sira loke dalan kultura, maibé ponte ne’e hotu sira la taka fali kultura.
“Ikus mai kontinua mosu sedimentasaun beibeik, bee halai tuir dalan difikulta komunidade no movimentu transporte públiku sira. Ami haree uluk halo ponte empreza sira husu lisan, depois ponte ne’e hotu la taka fali kultura. Tanba ne’e maka kada tinan sempre mosu beibeik sedimentasaun iha ponte Welolo. Nune’e, ha’u fó hanoin ba Xefe aldeia atu hadi’a kultura no ami halo kontribuisaun hosi uma-kain 100 resin fó apoia osan $5 kada família hodi sosa fahi no karau hodi taka kultura filafali,” Lian-na’in haktuir ba Agência Tatoli, iha ponte Welolo, kuarta ne’e.
Notísia relevante : Governu komunika empreza hodi rezolve sedimentasaun iha Welolo Viqueque
Nia dehan, uluk promete atu lori karau mai ponte ne’e maibé seidauk konsege, nune’e lori fali karau, enkuantu fahi sei halo bee ne’e lori ba ninia dalan ba tasi hodi tau-matan ba bee inklui osan mutin atu husu deskulpa.
“Kualtura ne’e ami halo ona iha sesta (02 juñu), maibé iha loron ne’e ami mós taka provizóriu ponte Welolo, ema labele liuhosi ponte leten, depois kultura ramata maka foin loke filafali ponte hodi ema liu,” nia akresneta.
Iha fatin hanesan, Administradór munisípiu Viqueque, Januário Soares ‘Bolly’, haktuir, iha tempu okupasaun portugés, abitante sira kuru bee iha mota hodi konsunu, maibé agora mota mós la tuir ninia dalan.
“Bee halai tuir fali iha dalan. Governu atu halo normalizasaun ba mota Welolo maibé presiza hasai kustu boot, tanba ne’e parte lian-na’in sira foti inisiativa kria serimónia kulturál ida hodi halo loos mota Welolo tuir ninia dalan. Tanba sedimentasaun ne’e tinan kotuk hadi’a ona, maibé agora mosu fali,” nia tenik.
Iha tinan 2022, Institutu Jestaun Ekipamentu Apoiu Dezenvolvimentu Infraestrutura, Instututu Públiku (IGEADI, I.P) destaka ona ekipamentu pezadu hodi hamoos sedimentasaun ne’ebé taka ponte, maibé iha tinan 2023 mosu fali sedimentasaun ne’ebé halo mota halai tuir dalan no fó impaktu ba uma-kain 31 iha área Welolo.
Jornalista : Vitorino Lopes da Costa
Editora : Julia Chatarina
