VIQUEQUE, 07 juñu 2023 (TATOLI)—Bee Timor-Leste, Empreza Públika (BTL, E.P) munisípiu Viqueque konsege rekolla reseita $4.951,30 hosi konsumidór bee-moos durante fulan-tolu, janeiru to’o marsu.
“Trimestre dahuluk tinan 2023 ami rekolla ona reseita $ 4.951,30. Reseita sira ne’e maihosi ita-nia konsumidór sira iha postu Viqueque Vila, enkuantu ba postu haat seluk seidauk aplika kontadór,” Supervizór BTL, E.P, Marito da Costa, informa ba Agência Tatoli, iha ninia kanaar fatin, Beloi, kuarta ne’e.
Kliente BTL, E.P iha postu Viqueque Vila ne’ebé selu metru kontadór bee-moos kada fulan ba Estadu hamutuk uma-kain 247, nune’e empreza estatál ne’e sei esforsu hodi monta tan metru kontadór ba uma-kain sira ne’ebé seidauk monta metru kontadór.
“Hosi uma-kain 247 ne’e ami liga bee kada uma no monta kontadór inklui edifísiu sira iha munisípiu Viqueque, kada uma-kain sira-ne’ebé monta ona kontadór ne’e kada fulan sira mai selu direta bazeia ba utiliza bee ne’ebé komsumidór sira uza. Daudaun ne’e ami sei kobre iha zona Beloi hahú hosi ponte Buanurak to’o sentru saúde Viqueque Vila, bainhira zona dahuluk ne’e monta hotu metru kontadór maka foin muda ba zona seluk,” nia akresenta.
Notísia relevante : BTL, E.P Viqueque rekolla reseita $5.423,90 hosi maiu to’o novembru
Fulan janeiru rekolla reseita $1.856.90, fevereiru $1.249,20 no marsu $1.845,2.
Enkuantu iha trimestre daruak iha abríl $797,40 no maiu $1.624,40, nune’e totál hamutuk $2.421,80.
Reseita tinan 2022 hosi trimestre dahuluk rekolla $660, trimestre daruak $980, trimestre datoluk $1.584,30 no trimestra dahaat $4.646,60.
Kona-ba selu taxa tuir kategoria hanesan konsumidór baibain aplika sentavu 0,20 kada kúbiku ida, nune’e kada fulan sei selu $5. Ba konsidór sira ne’ebé utiliza ba negosiu, indústria, loja, no edifísiu aplika $0,60.
Nia dehan, ekipa BTL, E.P munisípiu Viqueque durante ne’e hasoru dezafiu hanesan udan ne’ebé sempre halo kotu liña distribuisaun bee-moos ba konsumidór sira iha postu Viqueque Vila.
“Dezafiu ne’ebé ami hasoru dala barak udan estraga beibeik liña distribuisaun bee-moos. Maibé, ami sempre esforsu-an hodi rezolve atu komunidade bele asesu bee-moos,” nia tenik.
Daudaun ne’e, traballadór ne’ebé serbisu BTL, E.P munisípiu Viqueque hamutuk 14 hodi fó atendimentu ba kliente sira.
Jornalista : Vitorino Lopes da Costa
Editora : Julia Chatarina
