Konstrusaun UNP tolu iha Soba seidauk finaliza tanba la asesu dalan

DILI, 07 juñu 2023 (TATOLI)—Diretora Sekretariadu Tékniku Programa Nasionál Dezenvolvimentu Suku (PNDS), Claudinha Soares Pinto, hateten konstrusaun UNP tinan 2021 ne’e iha uma tolu iha suku Soba, postu administrativu Laga, munisípiu Baucau seidauk finaliza, tanba ekipa jestaun suku labele asesu ba dalan hodi lori materiál konstrusaun.
Notísia Relevante: Estrada aat halo konstrusaun UNP iha Wairoke-Soba-Fatuk Makerek paradu
“Dalan la asesivél hodi ita labele finaliza uma tolu ba programa UNP 2021 nian liuliu iha suku Soba nian, maibé ita nafatin esforsu atu bele finaliza tanba agora bailoron ona. Nune’e, ami tenta hela ho benefisiáriu sira atu oinsá kontribui hodi lalin sasán ba fatin halo uma ba ne’e. Se lae, ita mak nune’e hela de’it,” nia dehan Agência Tatoli iha nia kna’ar fatin Colmera, tersa ne’e.
Nia dehan, konstrusaun uma tolu iha suku Soba mak seidauk konklui, agora seluk fali iha suku ida iha Lautém nian mós seidauk maibé ekipa tenta ona.
“Ida-ne’e, ita bele lori sasán ba tanba dalan iha hela só ke tempu udan mak labele, maibé ohin simu informsaun hosi ekipa katak daudaun ne’e bele lori material ba fatin ne’ebá. Ne’ebé ha’u hanoin sei di’ak maibé iha Soba mak labele asesu duni dalan no ita la’o to’o oras haat mak foin to’o, ida-ne’e susar maibé nafatin esforsu nune’e bele finaliza,” nia dehan.
Ho preokupsaun no problema dalan hirak ne’e, nia dehan, to’o ekipa PNDS lori motor ho karreta PNDS nian hodi tula sasán sira-ne’e, tanba de’it ajuda benefisiáriu hodi finaliza tiha konstrusaun uma ne’e.
Benefisiariu ba programa Uma Kbit Laek (UKL) ne’e hamutuk 1.254 no osan ne ebé prevee hamutuk millaun $25 ne’e aloka ba suku 424 no kustu ba kada Uma Kbiit Laek ne’e entre $14.000 no $17.000.
Jornalista : Osória Marques
Editór : Cancio Ximenes

