DILI, 09 juñu 2023 (TATOLI)–Membru Parlamentu Nasionál (PN) lamenta ho krize kombustivel iha rai-laran.
Notísia Relevante: ANPM konfirma semana oin estoke kombustível bele normál fali
“Lamentável tebes situasaun ida-ne’e, oinsá mak kombustível laiha Pertamamina sira ka estasaun kombustível, maibé mina eceran faan fali iha li’ur iha fali, depois uitoan hela $6 kedas, ne’e halo ita konfuzaun ituan. Ne’e krize ida ita tenke ezije ba sé mak responsabiliza ba buat sira-ne’e,” Xefe Bankada FRETILIN iha PN, Deputadu David Dias Ximenes ‘Mandati’, hateten ba jornalista sira iha uma fukum Parlamentu Nasionál, sesta ne’e.
Tanba ne’e, nia hateten, presiza kontrola no observa hosi parte kompetente hodi hatene didi’ak tanba sa kombustível iha fatin abastamentu laiha maibé faan iha li’ur iha fali no mai ho presu ne’ebé aas.
“Keta halo ba, hanesan komersíu ninian hanesan ne’e tiha depois sira faan karun liután, ne’e halo susar povu no ida-ne’e labele. Ita hotu-hotu tenke lamenta, sé mak halo buat sira-ne’e iha kedas peskiza ida lais tebes ba para haree tuir sé mak halo keta halimar fali ho buat sira-ne’e,” nia hateten.
Notísia Relevante: Pertamina International garante estoke kombustível sufisiente
Nia preokupa, situasaun krize kombustível ne’e fó impaktu ba ema-nia atividade movimentu uza transporte.
Xefe Bankada CNRT, Deputadu Duarte Nunes, hateten situasaun ne’e akontese beibeik ona no tuir informasaun loron hirak liu ba fó sai iha notísia katak Pertamina Internasionál ho ETO sei garante suplay mina kombustível.
“Ita espera katak sira kompreende situasaun atu labele hamosu fali indivídu mak hola fali faan fali ho presu ida ema tenke hola, entaun situasaun ne’e ita espera ita-nia emprezáriu sira mós hanoin ba dook. Labele aproveita situasaun sira, nune’e para tiha no faan fali ema indivídu balun depois sira faan fali, ne’e ladún di’ak,” nia hateten.
Nia mós husu ba parte kompetente atu haree ema balun faan fali kombustível iha dalan ninin ho presu boot.
“Ema ruma mak kria situasaun hanesan ne’e hodi ema aproveita, espera parte kompetente buka ko’alia ho empreza sira-ne’ebé iha mina hodi labele hamosu situasaun sira hanesan ne’e,” nia dehan.
Notísia Relevante:Estasaun kombustível iha Dili taka tanba estoke mina hotu
Jornalista : Nelson de Sousa
Editór : Cancio Ximenes
