DILI, 26 juñu 2023 (TATOLI) – Eskola Bázika Filiál (EBF) Watumaloli iha suku Nahareka, postu administrativu Ossú, munisípiu Viqueque, ne’ebé anin sobu iha fulan rua liubá seidauk hetan apoiu husi Ministériu Edukasaun, Juventude no Desportu (MEJD).
Koordenadór EBF Watumali, António da Silva, hatete eskola iha sala aula haat ne’ebé mak nia sala rua maka anin sobu iha 07 abríl ne’e.
“Ami informa antes ona ba diresaun servisu edukasaun munisipál kona-ba kondisaun eskola ne’ebé anin sobu, maibé to’o agora seidauk hetan informasaun ida katak atu hetan apoiu emerjénsia husi Ministériu Edukasaun”, António da Silva dehan.
Tuir nia, sala haat ne’ebé iha eskola EBF Watumaloli ne’e ida profesór sira uza, rua ba estudante primeiru no segundu anu no ida seluk bá estudante terseiru no kuartu anu. Tanba sala rua maka anin sobu tiha, entaun prosesu aprendizajen ladún la’o ho di’ak.
“Ami agora halo jestaun rasik atu labarik sira labele lakon prosesu ensinu. Ne’ebé ami tau estudante primeiru no segundu anu iha sala ida depois terseiru no kuatru anu iha sala ida”, realsa.
Eskola ne’e rasik foin maka rejista estudante hamutuk 68 ho profesór lima, kompostu hosi permanente rua no kontratadu tolu, maibé eskola ne’e la tama iha Projetu Konstrusaun no Reabilitasaun Infraestrutura Edukativa ne’ebé Ministériu Edukasaun halo iha territóriu.
Diretór Nasionál Asaun Sosiál Eskolár (DNASE), Joaquim Martins, haktui simu ona pedidu husi munisipiu Viqueque kona-ba kondisaun EBF Wautumaloli nian, maibé dalan maka lagarante atu distribui material emerjénsia, tanba udan no mota la fó fatin atu asesu dalan bá eskola refere.
Jornalista: Tomé Amado
Editora: Maria Auxiliadora
