DILI, 27 juñu 2023 (TATOLI) – Plan Internasionál fakulta formasaun kona-ba saúde reprodutiva ba alunu sira iha eskola hamutuk 30 iha munisípiu Aileu, Ainaro, Baucau Covalima, Dili no Rejiaun Administrativa Espesiál Oé-Cusse Ambeno (RAEOA) ho objetivu atu hadook labarik feto no mane sira husi kaben no ko’us sedu.
Diretora-Ezekutiva Interina husi Plan Internasionál, Fátima Estrela Soares, afirma formasaun ida ne’e destina ba estudante sira iha ensinu báziku terseiru siklu no ensinu sekundáriu sira atu hetan koñesimentu sobre asuntu ne’e, tanba númeru labarik feto no mane kaben sedu ne’e aumenta barak.
“Ami halo intervensaun liuhusi matéria estra ida ba eskola 30 iha munisípiu lima inklui RAEOA atu kapasita labarik sira liuhusi formasaun atu sira bele iha koñesimentu di’ak liu kona-ba asuntu reprodutivu ba sira-nia isin-lolon katak ho idade hira maka bele kaben no hira mak bele ko’us”, dehan dirijente ba Tatoli iha Bairo dos Grilhos.
Formasaun kona-ba saúde reprodutiva ne’e Plan implementa iha eskola sira ho métodu oioin, liuhusi módulu no matéria komprensiva tebes atu fasilita labarik feto no mane sira oinsá atu hapara violénsia bazeia ba jéneru iha eskola, nune’e ajuda sira bele iha koñesimentu ida di’ak atu labele lakon sira-nia futuru hodi forma família sedu.
Nia hatutan formasaun estra ne’ebé Plan realiza ba labarik sira ne’e iha eskola balun maka labarik sira sai kampeaun ba mudansa sira, tanba iha ona koñesimentu ne’ebé di’ak no agora sira sai fali treinadór ba kolega sira seluk.
Programa saúde reprodutiva ne’e rasik agora akumula ona joven feto no mane hamutuk 300-resin mak hetan ona formasaun, aléinde ne’e halo mós liuhusi online tanba daudaun ne’e maioria timoroan barak maka uza telefone android ne’ebé hanaran online seguru.
Programa violénsia bazeia ba jéneru no edukasaun saúde reprodutiva ne’e iha ninia orsamentu própriu ho montante rihun $100-resin ne’ebé Plan Internasionál ezekuta kada tinan hodi bele asegura jerasaun foun sira husi kauza ne’e.
Programa sira ne’e hotu Plan ezekuta tanba iha ona kooperasaun ho Ministériu Edukasaun, Juventude no Desportu dezde 2001. Atividade sira ne’e ho ninia durasaun tempu tinan lima, ne’e duni ko’alia kona-ba formasaun saúde reprodutiva Plan mós haforsa programa eskola seguru ho komprensivu husi jestaun risku dezastre iha nivel eskola no promove eskola reziliénsia ba mudansa klimátika no impaktu ba desastre no seluk tan.
Notísia relevante: Plan Internasionál implementa Biblioteka Hale’u iha munisípiu rua
Jornalista: Tomé Amado
Editora: Maria Auxiliadora
