DILI, 23 Outubru 2025 (TATOLI)—Gabinete Primeiru-Ministru apoiu adisionál rihun $200 ba Konsellu Imprensa (CI, sigla portugés) atu fasilita formasaun hodi hasa’e jornalista sira-nia koñesementu.
Prezidente Konsellu Imprensa Timor-Leste, Cezar Mali, hateten orsamentu ida-ne’e apoiu husi Gabinete Primeiru-Ministru iha momentu diskusaun ba Orsamentu Jerál Estadu iha fulan hirak liubá, maske sira laiha proposta adisionál hodi submete ba OJE 2026, maibé ida-ne’e inisiativa rasik husi Primeiru-Ministru hodi hasa’e kapasidade jornalista nian.
“Tamba ne’e mak Primeiru-Ministru oferese adisionál ho montante rihun $200 mai CI hodi fasilita formasaun ba jornalista sira, Nune’e ami halo kedas diskusaun koletiva ho ezekutivu sira hodi hahú elabora planu ba identifikasaun formadór, fatin no preparasaun kalendáriu formasaun, entaun planu iha ona no daudaun ne’e iha hela prosesu preparatóriu,” PrezidenteCI informa ba Agência Tatoli iha ninia kna’ar fatin, Kinta Boot, ohin.
Formasaun ida-ne’e sei fó biban ba jornalista sira-ne’ebé mak iha ona karteira profisional, iha mós kartaun estajiu husi mídia sira-ne’ebé mak rejistadu ona iha Konsellu Imprensa, tanba defisil ba CI atu identifika jornalista sira-ne’ebé servisu iha plataforma oioin, nune’e prefere liu ba jornalista ne’ebé iha ona karteira profisionál.
Formasaun ne’e sei hala’o iha rai-laran tanba haree ba kuantidade jornalista ne’ebé mak barak, kuaze 180-resin mak sei tuir formasaun ida-ne’e entaun CI labele lori ema hotu ba rai-li’ur tanba orsamentu limitadu.
“Inisiativa ida-ne’e atu fó biban ba jornalista sira partisipa, tanba se ita halo iha rai-li’ur entaun balun de’it mak ba no balun labele ba. Formasaun ne’e sei hala’o durante tinan ida tanba ita uza OJE 2026 nian no sei hahú iha fulan-Janeiru to’o Dezembru,” nia informa.
Tuir nia, matéria espesífiku ba formasaun ne’e hanesan jornalista investigativu, hakerek istória feature, literásia ba AI, verifikasaun faktu, sustentabilidada planu negósiu mídia no jornalizmu dadus (data).
“Ba tinan ida-ne’e, ami hakarak fó formasaun ba jornalista sira ho kualidade ne’ebé aas, nune’e ami identifika formadór ne’e kualifikadu husi nasaun estranjeiru atu sira bele fornese formasaun ne’ebe di’ak ba jornalista sira maibé sei iha mós timoroan balun,” nia hateten.
Jornalista : Alexandra da Costa
Editór : Cancio Ximenes
