DILI, 30 juñu 2023 (TATOLI)—Sekretaria Estadu Formasaun Profisionál no Empregu (SEFOPE) liuhosi Diresaun Nasionál Empregu no Exteriór (DNEE), sesta ne’e, fó sai rezultadu balun hosi aplikante 55.436 ba vaga online Austrália, ne’ebé antes ne’e fó sai ba públiku iha loron 06 marsu 2023.
“Daudaun ne’e ekipa halo avaliasaun ba etapa dahuluk to’o juñu 2023, konsege avalia ona kandidatu traballadór 14.000 hosi apliante 55.436. Hosi kandidatu traballadór ne’ebé ekipa konsege avalia, iha ema na’in-2.500 mak prienxe kritéria hodi hakat ba faze teste inglés ka entrevista ho lian inglés nian,” Diretór Jerál Formasaun Profisionál SEFOPE, Paulo Alves, hateten iha salaun DNEE, iha Becora.
Daudaun ne’e SEFOPE fó sai uluk aplikante balun hodi responde ba demanda serbisu hosi Austrália, ne’ebé tinan ne’e presiza ema 8.000.
“Hosi númeru 8.000 ne’e, timor-oan tenke prinxe kritériu mínimu semi-skilled, importante tebes ba ita atu fornese kandidatu sira ne’ebé iha kualidade a’as ba empregadór sira. Bainhira ita falla atu responde ba demenda ne’e, iha risku ba ita tanba empregadór sira bele esplora opsaun alternativa ba iha nasaun sira seluk, ho ida-ne’e mak ita fó sai uluk aplikante balun,” nia akresenta.
Notísia relevante : SEFOPE simu aplikante 55.436 hosi rezultadu rekrutamentu foun traballadór Austrália
Paulo dehan, ba aplikante balun ne’ebé naran seidauk sai, ekipa avaliasaun sei kontinua halo verifikasaun tanba daudaun ne’e sei iha aplikante 36.000 resin mak seidauk halo avaliasaun.
Ekipa DNEE halo avaliasaun bazeia ba kritériu espesífiku lima hanesan aprezenta informasaun pesoál ho loos, iha kualifikasaun formál ba área nia aplika ba, hatudu esperiénsia serbisu tinan-rua ba leten, iha kuñesimentu lian inglés ho di’ak no kualidade pesoál di’ak.
“Ba kandidatu sira ne’ebé pasa teste iha lian inglés (entrevista), naran sei tama ba sistema baze dadus DNEE nian ka Work Ready Pool no sei oferese ba empregadór sira tuir rekezitu ba sira-nia kapasidade no kualifikasaun espesífiku sira,” Diretór adianta.
SEFOPE opta prosesu ne’ebé uluk halo ona, tanba ne’e Governu halo de’it selesaun ba kandidatu elejível bazeia ba kritéria ne’ebé iha sistema, maibé rekrutamentu halo hosi to’os-na’in ka empreza-na’in sira hosi Austrália.
“Ita hakarak husu, ba hirak ne’ebé naran la mosu iha lista ne’ebé publika, karik tanba ita-boot sira-nia nia apikasaun sei avalia hela ka la prienxe kritéria espesífiku sira,” nia tenik.
Aplikante sira ne’ebé daudaun prienxe ona kritéria, naran sei taka sai iha SEFOPE online no sei taka to’o ba munisípiu sira tanba aplikante sira ne’e barak maihosi munisípiu, liu-liu área rurál sira.
Aplikante sira ne’ebé liu sei ba serbisu iha área lima hanesan agrikultura, ospitalidade, konstrusaun, hein ferik katuas no peska.
Jornalista : Arminda Fonseca
Editora : Julia Chatarina
