DILI, 01 jullu 2023 (TATOLI)—Ministru Obra Públika (MOP), Samuel Marçal, hateten programa prioridade IX Governu Konstitusionál ba loron 100 dahuluk ne’e, ministériu obra públika sei tau prioridade dahuluk ba estrada dirasaun entre nasionál ba munisípiu, eletresidade, no bee-moos ba komunidade iha territóriu nasionál.
Notísia Relevante: PM Xanana: “Loron 120 sei anula lei kria munisípiu Ataúro-konsolida pás”
“Estrada munisípiu hotu-hotu sai prioridade primeiru kedas. Nune’e mós eletresidade no bee-moos sai prioridade ba Governu ida-ne’e,” Minsitru Samuel Marçal hateten ba Agência Tatoli, hafoin simu pose iha Palásiu Prezidensiál Nicolau LObato, Bairru Pite, sábadu ne’e.
Governmante ne’e hatutan, prioridade sira-ne’e, sei aselera iha loron 100 nia-laran maibé sei labele konklui iha tinan ne’e tanba iha ratifikativu maibé sei tama iha planu ba tinan 2024 nian.
“Tanba tinan ne’e, ita labele halo barak tanba iha ratifikativu, maibé ita tama ba planu tinan 2024 nian. Ita tenke servisu makaas no tenke aselera, nune’e atinje metas ne’ebé Governu ne’e iha ona,” Samuel Marçal hateten.
Kona-ba Programa Eletrifikasaun Nasionál (PEN), nia hatán, iha polítika sei reforsa eletrifikasaun nasionál tanba tuir planu iha tinan lima (5) nia laran tenke tenke finaliza.
Notísia Relevante: PR Horta rekomenda membru IX Governu serbi povu ho onestidade
“Klaru ita sei kontinua progresu sira hanesan Programa Eletrifikasaun Nasionál iha territóriu nasionál tanba ita iha suku maizumenus 70 mak seidauk iha. Ne’ebé, ita hakarak reforsa iha tinan lima nia-laran, nune’e ita bele konklui eletrisidade ne’e ho 100%,” nia dehan.
IX Governu liu-liu ministériu obra públika (MOP) sei kontinua no garante obra sira-ne’ebé Governu anteriór seidauk konklui no sei garante mós kustu implementasaun tuir lei ne’ebé iha.
Ministru ne’e hateten, iha loron dahuluk sei halo introdusaun ba funsionáriu, xefe departamentu, no diretór sira iha ministériu nian, hafoin halo planu no halo servisu.
“Iha loron 100 nia-laran, ha’u sei fó prioridade liu mak ha’u tenke halo vizita lai ba dirasaun MOP nian, haree saida mak falta no saida mak ita presiza aumenta. No, sei halo introdusaun ba funsionáriu MOP nian hodi hamutuk halo planu, nune’e saida mak ita halo primeiru tenke ba oin,” nia hateten.
Notísia Relevante: Ministra Edukasaun: “Ha’u mai atu kontinua serbisu ne’ebé uluk lakonsege halo”
Jornalista : Osória Marques
Editór : Cancio Ximenes
