DILI, 05 jullu 2023 (TATOLI)—Ministériu Finansa (MF) prepara hela planu, Orsamentu Retifikativu no Orsamentu Jerál Estadu (OJE) ba tinan fiskál 2024, ne’ebé hanesan mós programa prioridade loron-120 ba IX Governu Konstitusionál.
“Prepara Orsamentu Retifikativu no Orsamentu Jerál Estadu tinan 2024. Preparasaun daudaun ami hein hela estrutura orgánika Governu nian nune’e prontu hodi kontinua servisu,” Ministra Finansa, Santina Cardoso, hateten ba Agência Tatoli, iha Palásiu Governu, kuarta ne’e.
Daudaun ne’e MF mós analiza hela orsamentu ne’ebé mak iha, kona-ba despeza no balansu sira.
Nia dehan, Governu seidauk iha planu bainhira maka sei lori Orsamentu Retifikativu ba Parlamentu Nasionál (PN) tanba sei foku ba programa hodi ajusta ho orsamentu ne’ebé Governu sei ezekuta tuir kompromisu polítiku ne’ebé iha.
Notísia relevante : Governu afirma kompromisu serbisu loron 120 nian iha reuniaun dahuluk KM
Antes ne’e, iha loron 17 novermbru 2023, PN liuhosi reuniaun plenária, aprova proposta-lei númeru 46/V(5a) OJE 2023 ho montante biliaun $3,16 iha finál globál ho votu a-favór 42, kontra 21 no abstensaun rua.
Proposta OJE 2023 ho montante biliaun $3,16 kompostu hosi orsamentu administrasaun sentrál biliaun $2,8 (montante ne’e inklui ona Fundu Kombatente Libertasaun Nasionál biliaun $1), orsamentu seguransa sosiál hetan alokasaun millaun $235,7 no Rejiaun Administrativu Espesiál Oé-cusse Ambeno (RAEOA) millaun $120.
Notísia relevante : PN aprova proposta-lei OJE 2023 biliaun $3,16 iha finál globál
Iha loron 20 dezembru 2022, PN liuhosi votasaun finál globál halo reformulasaun ba dekretu PN númeru 68/V kona-ba OJE 2023, hodi elimina fundu veteranu biliaun $1, ne’ebé Tribunál Rekursu (TR) deklara inskonstituisionalidade , ho rezultadu votasaun rezultadu votasaun a-favór 40, kontra 0, abstensaun 20.
Pedidu ne’e hato’o hosi Prezidente Repúblika hodi husu ba órgaun lejislativu halo reformulasaun ligadu ho Xefe Estadu nia pedidu ba TR hodi halo fiskalizasaun preventiva ba fundu veteranu biliaun $1 ne’ebé prevee iha proposta-lei OJE 2023 katak inkonstituisionalidade.
Nune’e, montate OJE 2023 to’o agora hamutuk biliaun $2,16, ne’ebé bazeia ba relatóriu hosi MF, iha mandatu ikus VIII Governu, to’o 24 juñu 2023, ezekusaun reál ba Governu tomak esklui kompromisu no obrigasaun sira millaun $552, enkuantu ezekusaun reál ba administrasaun sentrál millaun $529 hosi totál orsamentu alokadu biliaun $1,8. Autoridade RAEOA – ZEESM ezekuta ona millaun $22,6 hosi orsamentu alokadu millaun $120.
Jornalista : Antónia Gusmão
Editora : Julia Chatarina
