COVALIMA, 07 jullu 2023 (TATOLI)—Autoridade Covalima liuhosi Dirasaun Protesaun Sivil Jestasaun Dezastre Naturál, sesta ne’e, lori-fila ona vitima dezastre naturál ho tipu erosaun ne’ebé akontese iha suku Zulo, postu Administrativu Zumalai, munisipiu Covalima ba sira-nia rezidénsia.
Notísia Relevante: Bee-mota Rai Ketan lori-sasurut uma tolu iha suku Labarai
“Agora daudaun ita lori fila vitima sira, tanba haree situasaun klima loron-manas ona no haree mós kondisaun saúde tanba vitima sira afetadu no ameasadu,” Xefe suku Zulo, Joao Lopes de Carvalho, hateten ba Agência Tatoli, iha sentru evakuasaun eskola Tekniku Vokasionál Zumalai, sesta ne’e.
Lideransa komunitária ne’e hateten, maske reintegra vitima ho kondisaun ladún seguru tanba provizoriamente kada vitima ida-idak dada baraka mesak hodi hela bá.
Diretór Munisipál Jestaun Risku Dezastre Naturál, Quinto da Costa, hateten udan boot halo komunidade sai vitima ba dezastre naturál ho tipu rai halai iha postu administrativu Zumalai, munisipiu Covalima.
“Ohin, ita lori sira fila-fali ba sira-nia hela fatin. Vítima hirak ne’ebé ita lori-fila ne’e, simu ona apoiu emerjénsia hosi Governu,” nia dehan.
Udan boot hodi hamosu dezastre naturál ho tipu dezastre hanesan erosaun ne’ebé akontese iha suku Zulo, postu Zumalai no inundasaun akontese iha suku Zulo, iha aldeia Lale, Obukmil no Leogol ne’e, rezulta vítima hamutuk xefe família 162 no hosi numeru ne’e iha uma 52 mak hetan estraga totál.
Jornalista : Celestina Teles
Editór : Cancio Ximenes
