DILI, 11 jullu 2023 (TATOLI)—Sentru Lojístiku Nasionál (CLN, sigla portugés), planeia ona iha tinan ne’e sei sosa foos hamutuk toneleda 4.125 hosi nasaun Vientame no Índia.
“CLN iha fulan kotuk liubá loke konkursu públiku, ne’ebé ikus mai iha empreza tolu mak sai manán-na’in no daudaun sira iha ona rai-li’ur hodi prosesa foos atu lori mai. Iha fulan-agostu lae inísiu setembru ita-nia foos importasaun hamutuk tonelada 4.125 to’o ona iha Timor-Leste,” Diretór Transporte no Lojístiku iha CLN, Tito da Costa, informa ba Agência Tatoli, iha ninia knaar-fatin, Bebora, tersa ne’e.
Notísia relevante : CLN prepara millaun $8 sosa produtu lokál variedade hitu
Empreza manán-na’in tolu ne’e mak hanesan Mamatelu Unipessoal Lda, sei hatama foos toneleda 1.400, Emerais Filgon Unipessoal Lda, hatama foos tonelada 1.400 no empreza Miramar Unipessoal Lda, sei hatam foos hamutuk tonelada 1.415.
Antes ne’e, Governu prevee ona orsamentu ba CLN atu sosa foos importasaun no produtu rai-laran hamutuk millaun $6.
“Millaun $6 ne’e ita fahe ba rua, millaun $3 ba akizasaun foos importasaun no millaun $3 sosa produtu rai-laran,” nia akresenta.
Jornalista : Arminda Fonseca
Editora : Julia Chatarina
