Top

KHUNTO sei vota a-favór ba programa IX Governu

Xefe Bankada KHUNTO, Deputada Olinda Guterres. Imajen TATOLI/Egas Cristovão

DILI, 18 jullu 2023 (TATOLI)—Xefe bankada KHUNTO iha Parlamentu Nasionál, Deputada Olinda Guterres, hateten KHUNTO sei vota a-favór ba programa IX Governu Konstituisionál.

Notísia Relevante: To’o 2028: IX Governu hakarak TL bele atinje edukasaun mellór kualidade

“Ami rona tiha ona programa IX Governu ne’ebé ita-boot (Primeiru-Ministru) aprezenta, iha aspeitu barak hanesan mós programa VIII Governu Konstitusionál nian, ne’ebé hahú uluk ona ho partidu CNRT, entaun programa hanesan barak no sei bele asegura kontinuidade ba dezenvolvimentu nasionál. Partidu KHUNTO kontente no simu apoiu programa ne’e sein rezerva. Ami sei fó votu a-favór ba programa nee’e, programa ne’ebé monu ba povu nia laran,” Xefe bankada KHUNTO ne’e hateten iha debate ba loron dahuluk ba programa IX Governu Konstitusionál nian iha PN, tersa ne’e.

Deputada ne’e foti kona-ba programa IX Governu kona-ba Banku Dezenvolvimentu Nasionál ho Governu nia intensaun atu kria banku ne’e no kna’ar sentrál fundu veternu ho fundu seguransa sosiál nian atu asegura sustentavilidade iha futuru.

Jeralmente ba inisiativa programa IX Governu KOnstitusionál ne’e define iha programa, nune’e partidu KHUNTO kontente tanba foka makaas ba dezenvolvimentu nasionál.

“Primeiru-Ministru, Kaya Rala Xanana Gusmão, hanesan aman ba nasaun nune’e fiar katak sei hala’o dezenvolvimentu nasionál ho di’ak no tau matan duni ba povu,” nia hateten.

Nia mós husu atu iha programa IX Governu iha área edukasaun aumenta sálariu ba profesór tanba iha profesór mak forma ema hodi lidera nasaun ne’e iha futuru.

Notísia Relevante: PM Xanana: “Loron 120 sei anula lei kria munisípiu Ataúro-konsolida pás”

Deputadu CNRT, Gabriel Soares, hateten hanesan reprezentante povu depois leitura didi’ak programa IX Governu nian no ka’er tan ho diskursu Primeiru-Ministru nian ohin, nia-parte hakarak hatete katak ida-ne’e mak programa ba povu, nune’e hakarak parabeniza IX Governu Konstituisional konsege elabora programa di’ak tebes.

“Ba partidu CNRT ho nia aliadu (PD) aprezenta programa mai iha ne’e, mai kedas hosi Governu dahaat to’o mai IX Governu, ohin ita tuur lori debate,” ’Deputada bankada Governu ne’e hateten.

Xefe bankada PD, António da Conceição ‘Kalohan’, hateten lori bankada PD nia naran nu’udar mós bankada Governu hakarak parabeniza IX Governu ba aprezentasaun programa iha loron ida ohin, tempu ne’ebé badak maibé Governu hola responsabilidade duni atu fó hikas konfiansa ba povu hodi lori fali normalidade atu hala’o hikas dezenvolvimentu nasaun nian, tanba tinan neen (6) nia laran TL moris duni iha inserteza polítika nia laran.

“Tanba ne’e, IX Governu hola responsabilidade atu normaliza fali situasaun sósiu-polítiku no ekonómiku nasaun nian, programa ne’ebé ohin Primeiru-Ministru aprezenta bazeia ba Planu Estratéjiku Dezenvolvimentu Nasionál 2011-2030, no programa ne’e asenta ba pilár haat Planu Estratéjiku Dezenvolvimentu Nasionál ho kompromisu neeen hanesan PM hato’o ne’e,” nia hateten.

Notísia Relevante: Governu kontinua implementa PED Setór Saúde 2011-2030 garante prestasaun serbisu di’akliu

Jornalista : Nelson de Sousa

Editór      : Cancio Ximenes

Publisidade

Leave a Reply

Latest Post

error: Content is protected !!