DILI, 19 jullu 2023 (TATOLI) – Diretór-Ezekutivu Banku Nasionál Komérsiu Timor-Leste (BNCTL, sigla portugés), Alcino Monteiro, informa katak banku seidauk bele transfere osan ba konta bankária benefisiáriu bolsa méritu 5.190 iha faze dahuluk husi totál 12.927, tanba presiza ajusta dadus estudante sira husi munisípiu Ainaro no Viqueque tanba montante osan boot liu fali númeru benefisiáriu.
“Hakarak informa bá públiku iha territóriu katak dadus ikus liu ne’ebé Banku Nasionál Komérsiu Timor-Leste update kona-ba dokumentu benefisiáriu bolsa méritu nian iha loron 11 jullu 2023, maibé to’o agora ami seidauk bele kredita osan ba konta bankária benefisiáriu sira-nian, tanba problema tékniku iha diferensa lista benefisiáriu no montante sumáriu husi munisípiu Ainaro no Viqueque”, Alcino Monteiro hatete iha edifísiu BNCTL Mandarin.
Dirijente ne’e dehan osan ne’ebé banku atu selu ba benefisiáriu husi munisípiu rua ne’e boot liu fali totál lista benefisiáriu sira-nian mak husi Ainaro iha totál sumáriu ne’ebé prevee hamutuk rihun $170, bainhira selu ba benefisiáriu sira sei iha restu $50 no husi Viqueque totál sumáriu hamutuk rihun $276, kuandu selu hotu ba benefisiáriu sira sei iha restu $500.
“Entaun, osan restu ne’e atu selu tan ba sé? Tanba ne’e maka banku haruka filafali lista husi munisípiu rua nian ba Ministériu Edukasaun atu ajusta halo loloos hodi haruka mai atu banku bele hahú selu ona. Pedidu banku nian kona-ba lista benefisiáriu husi munisípiu rua ne’e to’o agora seidauk iha resposta ida. Tanba ne’e maka banku labele foti desizaun mesak atu halo de’it transferénsia osan ba estudante sira-nian konta”, esplika.
Ba benefisiáriu iha munisípiu 11 ne’ebé nia dadus laiha ona problema no banku sei haruka ekipa ida bá hasoru malu ho Diresaun-Jerál Administrasaun no Jestaun Finansa Ministériu Edukasaun nian atu haree asuntu ne’e hodi bele rezolve lalais.
“Ita iha hanoin ona atu husu ba Ministériu Edukasaun hodi bele hahú selu ona estudante benefisiáriu bolsa méritu husi munisípiu 11 ne’ebé nia lista no sumáriu laiha ona problema, nune’e labele dada beibeik prosesu ne’e. Ita-nian ekipa téknika sei bá halo konfirmasaun ho ministériu atu foti desizaun ba asuntu ne’e”, afirma.
Iha sorin seluk, Diretór-Jerál Administrasaun no Finansa, Antoninho Pires, haktuir katak kona-ba lista husi munisípiu Ainaro no Viqueque nian ne’ebé BNCTL konsidera problema ne’e seidauk to’o iha nia meza. Tanba ne’e maka to’o agora Ministériu Edukasaun konsidera katak buat hotu hein de’it desizaun banku nia no bainhira maka atu selu estudante sira ne’e, tanba akordu ne’ebé maka parte ministériu no banku halo iha fulan-juñu fulan ne’e konsidera laiha ona problema.
Nia salienta, ba munisípiu 11 ne’ebé laiha ona problema ho dokumentu sira, antes ne’e Edukasaun orienta ona banku atu hahú ona halo pagamentu, maibé to’o loron ohin sira seidauk halo.
“Ita orienta ona sira iha banku labele adia ona pagamentu bolsa méritu ba estudante sira. Ba sira ne’ebé maka dokumentu loos ona bele selu, nune’e labele prejudika beibeik estudante sira”, realsa.
Totál osan ne’ebé maka ministériu no banku konkorda atu uza hodi halo pagamentu ba estudante bolsa méritu iha faze dahuluk ne’e ho montante millaun $4,2.
Notísia relevante: MEJD no BNCTL asina ona dokumentu transferénsia osan ba benefisiáriu bolsa méritu
Jornalista: Tomé Amado
Editora: Maria Auxiliadora
