MEJD no BNCTL asina ona dokumentu transferénsia osan ba benefisiáriu bolsa méritu
DILI, 30 juñu 2023 (TATOLI) – Ministériu Edukasaun, Juventude no Desportu (MEJD) no Banku Nasionál Komérsiu Timor-Leste (BNCTL, sigla portugés) asina, ohin, dokumentu atu halo pagametu ba benefisiáriu bolsa méritu hamutuk 9.996.
“Ohin ita ho BNCTL asina ona dokumentu atu halo pagamentu bolsa méritu ba ita-nian estudante sira. Hahú aban bá oin banku bele halo ona transferénsia osan ba sira-nian konta bankária”, Antoninho Pires informa ba Tatoli, iha Vila Verde.
Pagamentu bolsa méritu ne’e sei halo ba estudante 75% ne’ebé maka kompleta ona sira-nian dokumentu tuir rekizitu ne’ebé maka banku presiza. Ba sira ne’ebé maka la konsege rezolve sira-nian dokumentu to’o juñu remata ne’e konsidera la hetan direitu.
“Ho esforsu ne’ebé maka VIII Governu halo, liuhusi mandatu ikus ne’ebé maka Ministru Edukasaun iha ne’e konsege atinje ona rezultadu di’ak, tanba iha minutu ikus asina duni dokumentu ho BNCTL hodi fó biban ba banku atu halo pagamentu ba estudante bolsa méritu sira”, dehan.
Husi totál dadus benefisiáriu 12.927 ne’ebé tama iha lista estudante mellór klasifikadu, 9.996 mak sei hetan uluk direitu tanba iha ona konta bankária.
Notísia relevante: MEJD submete ona lista estudante bolsa méritu rihun 5-resin ba BNCTL
Jornalista: Tomé Amado
Editora: Maria Auxiliadora
