DILI, 20 jullu 2023 (TATOLI)—IX Governu Konstitusionál liuhosi Ministériu Asuntu Kombatente Libertasaun Nasionál (MAKLN) tau prioridade ba programa levantamentu dadus ema mate hahú tinan 1995 to’o 1999 liuhosi uma-lisan.
“Objetivu ministériu ne’e iha mandatu IX Governu atu tau filafali programa halo levantamentu dadus ba ema mate hahú hosi baze de apoiu to’o 1999 tanba to’o agora Timor-Leste seidauk iha dadus ruma ne’ebé hatudu loloos montante ema mate ba funu tinan 24. Uluk ha’u hanesan Sekretáriu Estadu iha Governu antes ne’e, molok sai, halo programa extra ida hanesan levantamentu dadus ba ema mate hosi tinan 1975-1999 tuir uma-lisan ida-idak iha territóriu laran, no agora sai ona programa definitivu ka prioridade ba IX Governu,” Gil da Costa Monteiro ‘Oan Soru’, hateten iha salaun Centro Nacional Chega, Balide, kinta ne’e.
Governante ne’e dehan Governu antes ne’e konsege halo ona levantamentu dadus, ne’ebé nia progresu atinje ona 25%, deskobre ema 2.218, ne’ebé daudaun iha ona baze dadus (database) maibé seidauk verifika.
“Agora ha’u mai fali ona, ita sei tau prioridade hodi identifika didi’ak ema hira mak mate momentu ne’ebá, nune’e ita bele hatene no hakarek sira-nia naran iha monumentu iha postu administrativu hotu,” nia akresenta.
Notísia relevante : IX Governu sei kria Fundu Veteranu
Ministru konsidera, levantamentu dadus liuhosi uma-lisan ne’e importante ho objetivu la’o ho grupu kiik tuir de’it uma-lisan foti dadus bele identifika hetan kedas, kompara ho konsentra iha públiku mak foti sei hamosu dadus falsu barak.
“Istória ita mak halo, mate ita-nia ema mak mate, nune’e husu ita hotu nia kontribuisaun no kooperasaun, ita presiza buka tuir maluk sira ne’ebé mate ba rai ida-ne’e hodi hatene númeru loloos, se lae ita tuur sik de’it númeru ne’e ladi’ak,” Oan Soru tenik.
Tuir nia, levantamentu dadus ema mate ne’e mak konsege foti no prezerva inklui istória funu nian, mak sei sai bukae ida ba timor-oan tomak, liu-liu jerasaun foun sira ne’ebé hakarak hatene istória funu.
Jornalista : Arminda Fonseca
Editora : Julia Chatarina
