DILI, 26 jullu 2023 (TATOLI)-–Ministériu Finansa (MF) liuhosi Diresaun Jerál Jestaun Patrimóniu Estadu, Foin lalais halo abertura leilaun ho modalidade hasta públika ba karreta 43, ne’ebé antes ne’e importadu hosi Austrália no a-favór ona ba Estadu.
“Sira (empreza manán-na’in) foti hotu ona karreta sira foin lalais Governu fó leilaun ne’e, Ha’u la lembra loron maibé sira foti iha fulan ida-ne’e,” Diretór Ezekutivu Timor Port, Rafael Ribeiro, hateten ba Agência Tatoli via telefónika, kuarta ne’e.
Diretór dehan, bainhira empreza na’in sira foti ona karreta, signifika katak sira kumpre ona prosesu legál sira inklui pagamentu.
“Sira halo loos hotu ona, signifika kumpre hotu ona saida mak husu iha prosesu leilaun ne’e ho Autoridade ho ami,” nia akresenta.
Notísia relevante : Governu halo leilaun veíkulu importadu 43 hosi Austrália
Antes ne’e, MF liuhosi Diresaun Jerál Jestaun Patrimóniu Estadu mós halo ona leilaun ho modalidade hasta publiku ba ai-teka, ikan no animál sira inklui mós ai-sunu tantu iha nível nasionál no munisipál.
Prosesu leilaun ne’e rasik konsidera nu’udar leilaun limitadu ne’ebé halo ba de’it empreza importadór veíkulu sira. Maski limitadu, maibé nafatin realiza ho forma kompetisaun entre empreza sira atu nune’e hatudu ba públiku katak prosesu ne’e tau a’as valór integridade, transparénsia no bele hetan fiar hosi públiku, liu-liu rekerente sira ne’ebé partisipa iha sesaun leilaun ne’e.
Atividade leilaun ida-ne’e implementa bazeia ba dekretu-lei númeru 32/2011 kona-ba jestaun no alienasaun bens móvel Estadu no diploma ministeriál númeru 15/2012 kona-ba manuál jestaun no alienasaun patrimóniu móvel Estadu.
Atividade leilaun ho objetivu atu salva guarda kondisaun bens móvel Estadu no hanesan fonte rekolla reseita doméstika.
Jornalista : Antónia Gusmão
Editora : Julia Chatarina
