PN seidauk simu data fiksu Governu aprezenta Orsamentu Retifikativu

DILI, 26 jullu 2023 (TATOLI)—Prezidente Parlamentu Nasionál, Maria Fernanda Lay, hateten seidauk simu data fiksu atu Governu atu aprezenta Orsamentu Retifikativu tinan 2023.
Notísia Relevante: IX Governu mantein biliaun $2,1 iha Orsamentu Retifikativu OJE 2023
“Seidauk! Governu hato’o mai liuhosi Vise Ministru Asuntu Parlamentár katak iha loron 10 (agostu) maibé ha’u lahatene iha loron 10 agostu ne’e mai duni ka lae,” nia hateten ba jornalista sira iha PN, kuarta ne’e.
Antes ne’e, Vise Ministru Asuntu Parlamentár, Adérito Hugo da Costa, hateten IX Governu Konstituisionál sei aprezenta Orsamentu Retifikativu 2023 ba iha Parlamentu Nasionál (PN).
“Sekuénsia sira depois IX Governu nian hanesan mós pose ba membru Governu sira anteriór, segundu sekuénsia depois pose ona aprezenta ninia programa, entaun programa aprezenta ona no PN aprova ona. Sekuénsia tuir mai mak Governu sei aprova dekretu-lei organika IX Governu ne’e nian hotu, tama ona ba Orsamentu Retifikativu submisaun,” nia hateten.
Notísia Relevante: PN aprova programa IX Governu ho apresiasaun unanimidade
Tanba, nia hatutan, síklu aprezentasaun ba orsamentu anuál nian tuir mudansa halo iha lei enkuadramentu orsamentál no mós lei grande opsaun planu ninian, entaun iha mudansa síklu aprezentasaun proposta orsamentu.
Orsamentu Retifikativu atu ajusta de’it ho estrutura organograma foun IX Governu Konstitusionál nian ne’ebé diferensa uitoan ajusta de’it mós ho espasu fiskál balun iha orsamentu 2023 la aumenta hodi sustenta despeza sira to’o fulan-dezembru.
“Governu mós depois OR aprova, imediatamente hatama tan planu Orsamentu Jerál Estadu (OJE) 2024, ne’ebé tuir lei orsamentu jestaun finansa tenke aprezenta iha 01 outubru,” nia dehan.
Enkuantu reuniun Konsellu Ministru foin lalais ne’e aprova ona organika IX Governu Konstitusionál.
Notísia Relevante: IX Governu sei aprezenta Orsamentu Retifikativu ba PN
https://tatoli.tl/2023/07/20/ix-governu-sei-aprezenta-orsamentu-retifikativu-ba-pn/
Jornalista : Nelson de Sousa
Editór : Cancio Ximenes

