DILI, 02 agostu 2023 (TATOLI)—Komisaun E trata asuntu Infraestrutura iha Parlamentu Nasionál (PN), kuarta ne’e, hala’o audénsia hodi bolu Governu hatán ba keixa hosi komunidade suku Kuluhun, postu administrativu Cristo Rei, munisípiu Dili, ne’ebé durante ne’e la asesu bee-moos.
“Ohin, komisaun E bolu Sekretáriu Estadu ho Bee Timor Lete Empreza Públiku (BTL,EP) atu rona informasaun sobre sistema iha suku Kuluhun nian, iha aldeia rua kuaze la hetan asesu ba bee-moos. Ne’ebé, ohin, ami mai aprezenta no esplika ninia kauza saida mosu hodi komunidade labele asesu,” Sekretáriu Estadu Eletrisidade, Água no Saneamento, Santos Noronha, hateten ba jornalista sira hafoin ramata audiénsia ho komisaun E iha PN.
Kauza dahuluk mak falta konxiénsia hosi komunidade, tanba transmisaun bee-moos ba iha tanke rezervatóriu, komunidade ne’ebé hela besik liña transmisaun halo perfurasaun ilegál kuaze lubun ida iha ne’ebá.
Entaun, bee ne’ebé mak oferese ba tanke ninia debitu ne’e kiik no nia labele distribui ba iha komunidade ne’ebé mak hela iha parte kraik, tanba to’o iha kraik ona, nia debitu bee ne’e kiik, entaun komunidade iha kraik la konsege atu hetan bee-moos.
“Parte Sekretáriu Estadu orienta ona ba BTL, E.P hamutuk ho tékniku sira tuun kedas ba terrenu, nune’e bele haree ninia kauza no saida mak bele halo responde urjente atu komunidade bele hetan bee-moos,” nia hateten.
Governante ne’e hateten, liga ba aldeia seluk iha kapitál Dili ne’ebé enfrenta situasaun hanesan, ida-ne’e mós sei orienta hotu tékniku sira atu identifika fatin sira-ne’ebé mak seidauk hetan bee-moos.
Nune’e, ba oin, bele halo meloramentu jerál liuliu iha kapitál Dili, tanba iha projeitu rua ne’ebé mak finansiamente serbisu hamutuk ho ADB no Banku Mundiál, ida kaer iha parte leste no ida kaer iha parte oeste.
“Ita sei halo preparasaun para melloramentu distribuisaun bee ne’e di’ak ba komunidade iha kapitál Dili,” nia hateten.
Jornalista : Nelson de Sousa
Editór : Cancio Ximenes
