COVALIMA, 03 agostu 2023 (TATOLI)—Komisaun D ne’ebé trata asuntu ekonómia no Dezenvolvimentu, kinta ne’e, halo fiskalziasaun polítika hodi observa direta ba prosesu perfurasaun mina iha posu Lafaek, Feto Kmaus no Liurai iha Covalima ne’ebé paradu durante tinan rua.
Notísia Relevante: Timor Resources haruka ona amostra mina posu lafaek ba Indonézia
“Ami mai observa bazeia ba karta ne’ebé kompañia internasionál Timor Resources submete ba Parlamentu Nasionál tanba tinan rua ikus ne’e prosesu perfurasaun iha Covalima paradu,” Prezidente Komisaun D PN, Ricardo Baptista, hateten ba jornalista sira iha resintu posu Liurai, Camanasa.
Kkomisaun D Parlamentu Nasionál observa direta relasiona simu karta hosi Timor Resources kona-ba dezentendementu akordu kontratu entre Timor GAP ho Timor Resources.
Hafoin Timor Resources submete karta ba Komisaun D, PN bolu kedas Ministru Petróleo no Minerál kona-ba problema entre Timor GAP ho Timor Resources ne’ebé fó impaktu ba atividade perfurasaun paradu durante tinan rua iha Covalima.
“Ami hala’o audiénsia bazeia ba karta ne’ebé ami identifika ona problema interpretasaun akordu ne’ebé sira halo entre Timor GAP ho Timor Resources,” nia dehan.
Interpretasaun akordu rua entre Timor GAP ho Timor Resources hanesan akordu negosiasaun iha tinan 2016 no Joint Operation Agreement ne’ebé halo iha tinan 2017 ne’ebé halo interpretasaun hanesan.
Jerente Timor Resources, Filomeno Andrade, hato’o agradesimentu ba Parlamentu Nasionál liuhosi Komisaun D hala’o observasaun direta ba posu hirak ne’e.
Notísia Relevante: PR Horta husu Timor Resources kontinua hala’o perfurasaun mina
“Ami hato’o agradesimentu ba deputadu sira husi komisaun D PN haree importante esplorasaun mina iha rai-maran, Timor Resources tama ona iha faze ida ita bolu faze kritikál,” nia dehan.
Iha prosesu esplorasaun atu mina iha ka lae, prosesu ne’e hakat liu ona tanba indikasaun mai hoi laboratóriu sei fó sai hosi Autoridade Nasionál Petróleo no Minerál (ANPM) maibé hatudu rezultadu di’ak.
“Ho nune’e, deputadu pagamentu sente importante atu hadi’a ekonomia iha rai-laran hafoin rona ami-nia relatóriu ne’ebé Timore Resources hasoru, sira rasik mai haree situasaun ne’e oinsá,” nia dehan.
Tanba, nia dehan, tinan rua resin ona prosesu paradu tanba ho razaun interpretasaun akordu entre Timor GAP ho Timor Resources kona-ba esplorasaun.
Durante hala’o prosesu perfurasaun ba posu Feto Kmaus, Liurai no posu Lafaek ne’e, kompañia internasionál Timor Resources gasta ona osan millaun $70.
Hosi prezensa deputadu hosi komisaun D iha Parlamentu Nasionál ne’e ba oin iha duni vontade ruma bele solusiona problema entermu legál no polítiku.
Entertantu, iha loron 27 fulan-outubru tinan 2021, eis Primeiru-Ministru Taur Matan Ruak hala’o lansamentu ba perfurasaun mina matan iha rai-maran ba dahuluk iha posu Feto Kmaus iha munisípiu Covalima.
Notísia Relevante: Ministru Victor orienta ANPM halo mediasaun ho Timor GAP, E.P no Timor Resources
Jornalista : Celestina Teles
Editór : Cancio Ximenes
