iklan

COVALIMA, ELEISAUN

CNE halo preparasaun ba eleisaun xefe suku ho edukasaun sívika

CNE halo preparasaun ba eleisaun xefe suku ho edukasaun sívika

Prezidente CNE, José Agostinho da Costa Belo. Imajen Tatoli/Celestina Teles.

COVALIMA, 11 agostu 2023 (TATOLI)–Prezidente Komisaun Nasionál ba Eleisaun (CNE, sigla portugés), José Agostinho da Costa Belo, hateten preparasaun ba eleisaun xefe suku ne’e diretór munisipál no komisáriu CNE sei hala’o edukasaun sívika ba komunidade iha área rural iha Covalima.

Notísia Relevante: STAE Covalima rekruta PSAS-PSAA 326 ba eleisaun xefe suku

“Edukasaun sívika ita-nia diretór munisípiu hamutuk ho komisáriu ita foku liu ba iha área rurál hodi halo esplikasaun pozisaun xefe suku no nia atuasaun oinsá, tanba papél xefe suku importante. Xefe suku la’ós de’it organiza sidadaun maibé líder úniku ne’ebé iha suku oinsá kompete ho di’ak hodi prezerva kultura,” Prezidente CNE ne’e hateten liuhosi nia diskursu, bainhira hala’o serimónia inaugural edifísiu CNE iha munisípiu Covalima, sesta ne’e.

Ho nune’e, nia dehan, CNE agora sei halo preparasaun atu realiza eleisaun suku maske ho nia karáteristika suku no aldeia maibé subtánsia boot, tanbaxefe suku ho aldeia mak hatene no besik liu populasaun.

Modelu eleisaun ba líder komunitáriu la hanesan ho deputadu sira, tanba deputadu sira partidu polítiku mak konkorre iha eleisaun parlamentár maibé ba eleisaun xefe suku nian ne’e kandidatu sira kompete direta.

Bazeia ba konstitisaun RDTL realiza eleisaun periódika tinan lima dala-ida ba prezidente repúblika no eleisaun ba deputadu sira liuhosi partidu polítiku, maibé eleisaun xefi suku ho nia mandatu tinan-hitu (7) ne’ebé bootliu prezidente nian.

Realiza eleisaun suku iha mudansa, maske la muda lei maibé fó espíritu boot oinsa hala’o eleisaun suku ho dignu no tranparánsia.

Antes ne’e, laiha rekrutamentu ba ofisiál atu halo supervizaun maibé sei halo rekrutamentu ba suku no aldeia tomak nia atu haree tomak kona-ba eleisaun suku.

Komandante PNTL Munisípiu Covalima, Calisto Gonzaga, reforsa servisu hosi CNE importante atu garante eleisaun ho justu, konfidénsiál no livre, nune’e ema hotu bele partisipa.

Bazeia ba kalendáriu, iha fulan-outubru tinan ne’e sei realiza eleisaun ba xefe suku sira, ne’ebé iha munisípiu Covalima iha nia suku hamutuk 30 ne’ebé hili nia emar sira atu sai líder komunitária garante dezenvolvimentu suku.

Antes ne’e, iha 07 agusto 2023 ne’e, Diretór Sekretáriu Tékniku Administrasaun Eleitorál munisípiu Covalima, Francisco Gusmão, hateten STAE sei rekruta pesoál STAE Apoiu Suku no Pesoál STAE Apoiu Aldeia (SPAA) hamutuk 326 hodi prepara atu realiza eleisaun xefe Suku.

Entretantu, STAE Covalima rejista totál eleitór mai hosi postu administrativu Fatululik, Fatumea, Fohorem, Fatumea, Tilomar, Maucatar, Zumalai no postu administrativa Suai hamutuk 49,469 ne’ebé ho nia suku 30 no aldeia iha 148.

Jornalista : Celestina Teles

Editór       : Cancio Ximenes

iklan
iklan

Leave a Reply

iklan
error: Content is protected !!