iklan

EDUKASAUN, OPINIAUN

Sá opsaun di’akliu ba língua ensinu iha TL?

Sá opsaun di’akliu ba língua ensinu iha TL?

Memensio Sequeira Freitas.

(Perspetiva Manorin no Kanorin kona-ba Língua Ensinu iha Timor-Leste)

Hosi: Memensio Freitas*)

 

Introdusaun

Preokupasaun kona-ba língua ensinu iha Timor-Leste sai mós hanesan matéria diskusaun ida iha sosiedade timorense, liu-liu sira-ne’ebé iha interrese ba setór edukasaun nu’udar setór xave ba dezenvolvimentu. Haksesuk malu entre língua ensinu ne’ebé merese no tuir liu realidade timorense nian sei iha pontu interogasaun. Tetun ka portugés mak sente konfortável no adekuadu liu atu utiliza iha eskola sira nu’udar língua ensinu?

Diskusaun sira kona-ba estudante sira la atene lee no ko’alia portugés to’o opiniaun públika ne’ebé julga manorin sira katak lahatene hanorin ho língua portugés sai matéria atu ita tetu hamutuk fila-fali sa solusaun di’ak mak ita tenke adota iha ita-nia sistema edukativu, nune’e ita-nia edukasaun bele fornese duni rezultadu ida di’ak tuir objetivu fundamentál sira-ne’ebé hatuur ona iha artigu lima (5) hosi Lei Baze Edukasaun.

Nu’udar ita hotu hatene katak, língua iha ninia papel importante tebes iha mundu edukasaun. Péritu balun hateten katak funsaun hosi língua ka dalen iha edukasaun ida mak nu’udar introdusaun ba iha matéria ka dixiplina sira. Sira salienta katat la ho língua ne’ebé di’ak no loos, prosesu aprendizajen sei la la’o ho di’ak no ita mós sei la hetan finalidade (rezultadu) di’ak hosi aprendizajen ne’e rasik.

Atu hatene oinsá língua fó ninia influensia ba prosesu ensinu aprendizajen, ita presiza hatene mós perspetiva ema hirak ne’ebé envolve direita iha prosesu ensinu aprendizajen, katak manorin no kanorin sira-nian. Tanba ne’e mak, hakerek-na’in koko halo ona survey prelemináriu ida iha eskola balun iha Dili hodi hatene saida mak manorin no kanorin sira ko’alia no hakarak kona-ba língua ensinu iha ita-nia rai doben Timor-Leste.

Baze Legál no Papel Língua Ensinu iha Prosesu Ensinu no Aprendizajen

Iha ita-nia Konstituisaun Repúblika artigu 13 pontu 1 hateten momoos katak RDTL nia lian ofisiál mak Tetun no Portugés (la iha obrigasaun ida atu kualker sidadaun ida ko’alia mak tetun ka portugés), maibé língua rua ne’e hotu-hotu ho estatutu nu’udar língua ofisiál.

Artigu 8 hosi Lei Baze Edukasaun (Lei N.º 14/2008 de 29 de Outubru) hateten momoos mós katak As línguas de ensino do sistema educativo timorense são o tétum e o português. Artigu ida ne’e (tuir ha’u nia interpretasaun) la fó obrigasaun ba manorin sira atu hanorin ho portugés ka tetun, maibé artigu ida-ne’e fó opsaun ka konformidade atu hanorin ho kualker língua hosi língua ensinu rua ne’e (ida-ne’ebé mak manorin sira sente domina no konfortável liu atu uza ba hanorin), embora maioria livru aprendizajen ka manuál didátika sira hakerek ho língua portugés.

Entretantu, iha loron 12 fulan-abril tinan 2023, Governu Timor-Leste aprova ona proposta hosi Ministériu Edukasaun, Juventude no Desportu kona-ba língua Portugés nu’udar língua instrusaun no ensinu iha Timor-Leste ba ensinu báziku to’o ensinu sekundáriu, enkuantu língua tétun nu’udar língua atu reforsa (apoiu). Aprovasaun ida-ne’e prosede ba alterasaun Lei Baze Edukasaun, liu-liu artigu 8 atu obrigatoriamente utiliza de’it língua portugés nu’udar língua ensinu, enkuantu tetun hela hanesan língua apoiu. Kabe ba Governu atuál atu altera Lei baze refere ka lae tuir prioridade IX Governu Konstitusionál nian.

Almeida Nuno (2008, p. 34) deskreve katak língua portugeza hetan mós estatutu seluk mak nu’udar Língua da Escolarização ou Língua de Instrução. Nia haktuir katak a língua portuguesa entende-se por língua de instrução/escolarização a língua veicular de acesso aos conhecimentos das outras disciplinas, ou seja, aquela em que os alunos têm de compreender, reter e aplicar conceitos das diferentes disciplinas do currículo.

Afirmasaun ida-ne’e iha ninia sentidu katak nu’udar língua ensinu ka língua instrusaun, língua portugeza sai hanesan fonte ida atu estudante sira apreende no asesa ba siénsia no koñesimentu sira, nune’e sira bele entende, defende no aplika ka implementa iha sira-nia vida kona-ba konseitu hotu ne’ebé sira apreende ona iha estrutura kurríkulu nian.

Sanjaya (2003, p. 29) deskreve katak ko’alia kona-ba utilizasaun língua iha prosesu ensinu aprendizajen sei la sees hosi língua ne’e rasik, utilizadór (falante) no ninia utilizasaun. Língua saida de’it mak eskollidu nu’udar língua ensinu, konserteza iha interligasaun ho sé mak ko’alia, saida mak nia ko’alia no iha ne’ebé mak nia sei ko’alia. Tanba, iha relasaun ho língua portugés nu’udar língua ensinu, klaru ke ema ne’ebé mak ko’alia língua ne’e mak manorin no kanorin sira (iha sira-nia interasaun iha prosesu ensinu aprendizajen), sira sei ko’alia kona-ba konseitu sira siénsia no koñesimentu sira bazeia ba estrutura kurríkulár no sira sei ko’alia iha sala-de-aula nian.

Nune’e, bainhira prosesu ensinu aprendizajen okore ho língua portugés karik, manorin ho kanorin sira la’ós de’it ona ko’alia portugés maibé sira ko’alia mós konseitu siénsia no teknolojia no utiliza portugés hanesan fonte ida. Maibé se sira uza karik tetun nu’udar fonte ba transmisaun siénsia, ne’e mós la sala buat ida, tanba língua hanesan de’it fonte ida atu siénsia bele tranzmite hosi manorin ba kanorin sira.

Ko’alia kona-ba língua ensinu, língua nia papel sai de’it hanesan faramenta ida atu tulun entendimentu no koñesimentu estudante sira-nian. Kualker língua ida bele introdús siénsia durante ninia falante sira sente konfortável no domina iha sira-nia interasaun iha sala-de-aula laran. Vygotsky (Spencer, 1998) hateten, intelijénsia mak kapasidade atu aproveita benefisiu hosi aprendizajen liuhosi língua nu’udar faramenta atu estuda no apreende. Nune’e, língua sai de’it hanesan fonte ba apoiu atu estuda aumezmu tempu ajuda atu entende no dezenvolve di’ak liután siénsia no koñesimentu ne’ebé ita aprende ona. Ko’alia badak karik, língua funsiona nu’udar meius ba dezenvolvimentu edukativu no akizisaun ba koñesimentu.

Akizisaun koñesimentu ida-ne’e ema bele hetan de’it liuhosi edukasaun, tantu edukasaun formál komu edukasaun naun formál. Nune’e, edukasaun iha ninia baze rasik mak komunikasaun no interasaun ho ema seluk. Ideia Zone of Proximal Development Vygotsky inspira katak ser umanu ne’e kriatura ne’ebé estudiozu. Espasu entre saida mak nia bele halo mesak no poténsia ne’ebé bele hala’o liu de’it hosi apoiu ema seluk nian (sira-ne’ebé adultu liu ka otas hanesan basta intelijente liu) posibilita aprendizajen akontese iha ema ida-nia vida. Tanba ne’e, língua ensinu sai de’it hanesan meiu atu siénsia no koñesimentu ne’e bele sirkula entre ser umanu sira liuhosi komunikasaun no interasaun resíproku.

Perspetiva Manorin no Kanorin sira kona-ba Língua Ensinu iha Timor-Leste 

Tuir dadus hosi Sensu Populasaun iha tinan 2015, hatudu katak hosi totál populasaun Timor-Leste ne’ebé iha, pursentu 30 de’it mak domina lian portugés no ko’alia iha sira-nia atividade kotidiana. Dadus ne’e hatudu katak maioria (70%) hosi populasaun ita-nian la domina ou ladún domina di’ak lian portugés biar Portugés nu’udar lian ofisiál iha Republika Demokrátika Timor-Leste. Hosi 70% ne’e inklui ona profesór no alunu sira-ne’ebé hasoru malu loro-loron iha prosesu ensinu no aprendizajen iha eskola sira, hahú hosi pré eskolár to’o ensinu sekundária, até ensinu superiór mós.

Responde ba preokupasaun públika kona-ba utilizasaun língua portugés nu’udar língua ensinu iha Timor-Leste, iha fulan rua liu ba kotuk hakerek na’in halo survey prelemináriu ida ba manorin no kanorin lubuk balun iha eskola (Ensinu Sekundáriu Jerál) balu iha Dili laran. Peskiza simples ida-ne’e atu hatene de’it perspetiva respondente (manorin no kanorin) sira-nian kona-ba nível kompleksidade hosi língua portugés nu’udar língua ensinu no sira-nia opsaun kona-ba alternativa seluk relasiona ho língua ensinu ba oin.

Hosi respondente ne’ebé iha (manorin sira ema na’in-40 no kanorin sira ema na’in-80), 70% hosi manorin sira afirma katak língua portugés ne’e defisil liu, tanba sira-nia formasaun akadémiku tomak ho Bahasa Indonésia no sira obriga aan tuir formasaun sira-ne’ebé oferese hosi Institutu Nasionál Formasaun Dosente no Profísionál Edukasaun (INFORDEPE, sigla portugés) maibé ladún ajuda sira iha transmisaun siénsia no koñesimentu iha sala aula laran.

Sira hateten, sira entende matéria ne’ebé sira hanorin no kumpreende deskrisaun matéria iha manuál didátiku (livru) laran tanba konseitu hanesan de’it, maíbe para tranzmite ho portugés ne’e mak susar boot. Hosi manorin sira 20% ne’e sente língua portugés ne’e baibain de’it (la defisil liu no la fasil mós) no 10% de’it mak konsidera katak língua portugés ne’e fasil, tanba sira bele tranzmite siénsia ba estudante sira iha sala-de-aula laran ho língua refere.

Aleinde ne’e, maioria manorin sira-ne’e akresenta katak defisil ida tuir sira-nia hanorin mak la’ós difisil ba sira-nia-aan atu intende ka domina matéria ensinu, maibé difisil bainhira sira tranzmite sira-nia koñesimentu ho lian portugés. Katak, se sira obriga aan atu ko’alia durante aula, sira ko’alia deít ho portugés mak meta kurríkulár ne’ebé iha sei la atinje tanba estudante barak la persebe matéria iha lian portugés. Ida-ne’e, konprova ho ha’u nia esperiénsia rasik, bainhira husu atu tranzmite siénsia ho lian portugés ka tetun iha loron dahuluk enkontru nian, maioria estudante prefere liu utiliza tetun duké portugés tanba sira konfortável liu ho tetun kompara ho portugés.

Hosi parte estudante sira-nian, pursentu 65 hatan katak língua portugés ne’e difisil, pursentu 20 hatan katak língua portugés ne’e baibain no 15% hateten katak língua portugés ne’e fasil tebes. Estudante balun salienta katak língua portugés defisil ba sira tanba ambiente ne’ebé sira hela ba la ajuda atu sira bele aprofunda sira-nia abilidade ba ko’alia portugés loroloron. Sira só halo interasaun ho língua portugés iha eskola ho manorin balun (liu-liu manorin ne’ebé hanorin língua portugés no sira-ne’ebé iha domínio ba lian portugés) maibé depois ida-ne’e, sira-nia interasaun tomak ho de’it ona tetun no língua materna sira. Até estudante barak konfesa katak iha uma sira nia aman-inan sira la ko’alia portugés ho sira, entaun difisil atu sira bele tuir aula ho língua portugés.

Husu kona-ba sá alternativa mak di’ak-liu refere ba língua ensinu ba oin entre portugés no tetun, 85% hosi manorin sira hakarak uza tetun nu’udar língua ensinu no 15% de’it mak hakarak atu kontinua ho portugés. Entretantu, hosi parte estudante sira-nian, 75% hakarak uza tetun nu’udar língua ensinu enkuantu pursentu 25 seluk hakarak mantein ho língua portugés nu’udar língua ensinu iha Timor-Leste.

Hosi respondente (manorin no kanorin) sira ne’ebé hakarak uza tetun nu’udar língua ensinu salienta katak tanba sira sente domina no konfortável liu ho tetun kompara ho portugés. Sira konsidera katak hatene língua barak ne’e di’akliu no tanba ne’e sira sente língua hotu-hotu ne’e importante, maibé atu tranzmite siénsia no koñesimentu ba estudante sira, dalan di’akliu mak uza tetun para ke manorin sira bele tranzmite ho didi’ak no estudante sira mós bele kapta, entende no absrove ho di’ak. Ida-ne’e katak para ke iha feedback ida di’ak hosi prosesu ensinu no aprendizajen ne’ebé okore iha sala-de-aula laran.

Se ita haree ba rezultadu sensu populasaun 2015 iha leten ne’ebé dehan 30% de’it hosi totál populasaun Timor-Leste ne’ebé domina língua portugés ho hosi rezultadu survey simples ida-ne’e, mak há’u hanoin katak perspetiva manorin no kanorin sira iha leten kona-ba língua ensinu iha Timor-Leste ne’e rasionál hela. Katak tanba maioria hosi populasaun Timor-Leste domina liu mak tetun kompara ho portugés, la sala buat ida se ita utiliza tetun hanesan língua ensinu. Basá, tetun mak língua ne’ebé manorin no kanorin sira sente konfortável no domina liu iha sira nia interasaun lorloron iha sala-de-aula laran.

Péritu balun subliña katak edukasuan nu’udar transfer of knowledge, transfer of value, transfer of culture and transfer of religius ne’ebé orientadu ba halo ema sai ema. Esénsia loloos hosi edukasaun mak nu’udar esforsu ida atu muda ema-nia komportamentu atu soin valór sira hanesan relijiaun, filózofia, ideologia, polítika, ekonomia, sosiál, kultura no defeza seguransa. Esensia hosi edukasaun refere sai hanesan paktu konkordánsia komún ida iha sosiedade mundial. Paulo Freire rasik dehan, edukasaun ne’e hanesan prosesu ida ba libertasaun ema-nian. Katak, edukasaun tenke soin kapasidade atu ema eduka nia aan rasik liuhosi siénsia no koñesimentu ne’ebé nia hetan ona iha banku estudu.

Ita-nia Lei Baze Edukasaun iha ninia artigu 5 mós difine loloos objetivu fundamentál hosi edukasaun ne’e rasik. Alinea “a” hateten momoos katak edukasaun iha atu contribuir para a realização pessoal e comunitária do indivíduo, através do pleno desenvolvimento da sua personalidade e da formação do seu carácter, preparando-o para uma reflexão consciente sobre os valores éticos, cívicos, espirituais e estéticos, proporcionando-lhe um desenvolvimento psíquico e físico equilibrado. Liu ida-ne’e, finalidade loloos hosi edukasaun mak atu kanorin sira hatene lee, hatene hakerek, hatene sura no absorve siénsia no koñesimentu ida natoon atu sira bele kontribui ba dezenvolvimentu rai ida-ne’e nian ba oin.

Atu atinje ida-ne’e, kualker língua bele utiliza sai fonte ba akizisaun siénsia no teknolojia. La apenas portugés de’it maibé karik tetun mós bele atinje meta ida-ne’e mak la sala buat ida se ita avalia fila-fali ita-nia desizasaun polítika kona-ba utilizasaun língua portugés nu’udar língua ensinu iha Timor-Leste, basá, manorin ho kanorin sira sente katak sira konfortável liu uza tetun iha sira-nia interasaun iha sala uala laran maibé la tebe sai mós importánsia hosi língua portugés ba sira-nia formasaun intelektuál ba oin.

Dala ida tan, survey ida-ne’e apenas survey prelemináriu ida ho rezultadu ne’ebé fó sai ona iha leten. Ba oin, peskizadór seluk bele hakle’an liu tan survey ida-ne’e paraké ita bele hetan konkluzaun ida reprezentativu ba iha sosiedade edukativu iha Timor-Leste laran tomak. Nune’e, Estadu liuhosi Ministériu Edukasaun bele haree no konsidera hodi halo avaliasaun kona-ba desizaun polítika utiliza língua portugés nu’udar língua ensinu iha rai doben Timor-Leste, no hanesan ne’e, ita bele garante kualidade iha ita-nia sistema edukativu iha ita-nia rai doben.

*) Hakarek-na’in nu’udar profesór baibain ida iha Ensinu Sekundária Jerál 12 Novembru Dili no hela iha Manleuana.

 

iklan
iklan

Leave a Reply

iklan
error: Content is protected !!