DILI, 16 agostu 2023 (TATOLI)—Ministériu Turizmu no Ambiente (MTA) iha tempu badak sei halo kampaña nasionál ida ho tema ‘Ha’u-nia Tasi, Ha’u-nia Timor’, ne’ebé hanesan parte ida hosi programa IX Governu atu kuidadu biodiversidade tasi no rai maran.
“Kampaña nasionál ne’e atu halo sensibilizasaun ba komunidade iha área kosteira sira, eskola no komunidade atu kuidadu ambiente no iha konsiénsia tau lixu iha nia fatin, nune’e tempu udan foer labele ba tasi no estraga biodiversidade,” Diretór Jerál Meiu Ambiente MTK, João Carlos Soares, hateten liuhosi programa entrevista eskluziva live streaming iha estúdiu Agência Tatoli, kuarta ne’e.
Notísia relevante : SEA planeia harii Laboratóriu Biodiversidade iha Hera tinan ne’e
Objetivu MTA halo kampaña nasionál ne’e tanba haree lixu sira ne’ebé daudaun kontinua sai preokupasaun públiku no estraga biodiversidade tasi no rai-maran.
“Udan no inundasaun boot afeta maka’as ne’e la’ós de’it ba infraestrutura, maibé mós ba tasi tanba foer hotu ba para iha tasi hanesan hena, masa embalajen no seluk tan belit iha ai-parapa no ahu-ruin. Ida-ne’e sei estraga populasaun ikan no animál tasi nian,” nia akresenta.
Kona-ba mudansa klimátika, lixu sai fatór importante ida, aleinde transporte, sunu rai arbiru no seluk tan. Maibé atu kombate lixu la’os de’it hosi parte ida nia de’it maibé ema hotu, tanba lixu ne’ebé kontinua nakonu iha kapitál Dili inklui munisípiu sira maihosi ema-nia konsiénsia menus.
“Espera planu kampaña nasionál ne’ebé ita sei halo bele enkoraja komunidade tau lixu iha nia fatin,” nia tenik.
Tuir peskiza iha kapitál Dili ema ida kada loron prodús lixu metade kilograma, tanba ne’e totál lixu ne’ebé iha loron ida saneamentu rekolla hamutuk tonelada 240. Lixeiru rasik iha pontu kolesaun hamutuk besik 200 iha kapitál Dili maibé abitante balun nafatin la kumpre soe lixu iha fatin.
Resiklajen lixu iha kapitál Dili foin atinje 5% de’it, signifika lixu 95% ne’e ba hotu Tibar, nune’e husu hotu-hotu nia kontribuisaun atu kombate lixu ho konsiénsia.
“Maske Governu iha ona polítika atu moderniza lixeira iha Tibar, maibé ida-ne’e to’o agora seidauk realiza, espera Ministériu Administrasaun Estatál (MAE) bele haree kestaun ida-ne’e. Tanba bainhira moderniza ona ha’u hanoin ida-ne’e mós sei kontribui atu redús lixu,” Diretór dehan.
Jornalista : Arminda Fonseca
Editora : Julia Chatarina
