DILI, 19 juñu 2023 (TATOLI)—Sekretaria Estadu Ambiente (SEA) liuhosi Diresaun Nasionál Biodiversidade (DNB) iha ona planu harii Sentru Laboratóriu Biodivesidade andar rua iha Hera.
“Ita prepara hela atu harii Sentru Laboratóriu Biodiversidade iha Hera hamutuk ho Sentru Jestaun Lafaek Exitu nian tanba dezeñu ami halo hotu ona, hein de’it Governu foun mai atu harii,” Diretó Nasionál Biodiversidade, Rui Pires, informa ba Agência Tatoli, iha ninia knaar fatin Bebora, segunda ne’e.
Notísia relevante : Diretór Biodiversidade husu ba públiku evita kasa animál protejidu
Nia dehan, objetivu SEA harii laboratóriu biodiversidade mak hakarak Timor-Leste tenke iha rikusoin sira hanesan ai-horis, animál tasi no rai-maran, nune’e rikusoin sira ne’ebé iha labele ema seluk mak mai foti ba tau fali iha sira-nia laboratóriu.
“Laiha laboratóriu futuru mai ita-nia rikusoin sira ne’e ema seluk mak mai foti ba tau iha sira-nia laboratóriu no sira mak sai na’in fali, entaun ita hahú harii ona laboratóriu nune’e iha futuru hatudu katak Timor-Leste iha rikusoin animál no ai-horis tantu tasi no rai maran ninia benefísiu ba ekonómiku bele hatene,” nia akresenta.
Aleinde ne’e, laboratóriu iha fó benefísiu mós ba estudante sira bele halo peskiza no uza ekipamentu sira ne’ebé iha hodi halo teste.
“Orsamentu ne’ebé ita atu harii ba Laboratóriu Biodiversidade nian ne’e foti hosi grande projetu hamutuk millaun $1,5 tanba ita halo andar rua. Fatin ida espesífiku ba laboratóriu no seluk sai edifísiu funsionáriu sira nian,” nia dehan.
Jornalista : Arminda Fonseca
Editora : Julia Chatarina
