iklan

COVALIMA, HEADLINE, POLÍTIKA

Governu sei rekruta ema na’in-3 apoiu xefi suku

Governu sei rekruta ema na’in-3 apoiu xefi suku

Sekretáriu Estadu Dezenvolvimentu Lokál, Mateus dos Santos Tallo, hala'o diálogu ho autoridade Covalima. Imajen Tatoli/Celestina Teles.

COVALIMA, 17 agostu 2023 (TATOLI)-Sekretáriu Estadu Dezenvolvimentu Lokál, Mateus dos Santos, informa atu fó asisténsia ba servisu xefe suku sira iha territóriu Timor-Leste maka tuir planu governu sei rekruta ema na’in tolu hodi reforsa servisu administrasaun, planeamentu no finansa iha  nivél suku.

Ita sei haree fali lei xefe suku atu ajusta ho programa sira, tinan oin xefe suku foun tuir planu ministru nian sei rekruta pesoál na’in-tolu hodi akompañia xefe suku iha suku-sira,” Nia hateten asuntu ne’e, iha salaun administrasaun munisipál Covalima kinta ne’e.

Notísia Relevante :CNE halo preparasaun ba eleisaun xefe suku ho edukasaun sívika

Rekrutamentu pessoal na’in tolu ne’e ho rajaun maka atu reforsa servisu iha nivél suku nian, tanba  to’o oras, ne’e xefe suku sira sei kontinua enfrenta problema kona-ba jestaun planeamentu, administrasaun no finansa.

Tuir nia situasaun riil ida maka to’o ohin loron suku barak seidauk  atualiza dadus foun kona-ba  monografia no demografia kada suku ida-idak iha territóriu Timor-Leste.

“Ita sei dijitaliza dadus monográfia no demográfia ho elektrónika no komputadór ne’ebé ita-boot sira simu sei dijitaliza dadus ne’ebé hakerek ho manuál,”nia dehan.

Governu Konstitusionál IX aprova ona kalendariu eleisaun ba xefe suku sira ne’ebé tuir planu sei realiza iha tinan 2023, nune’e mandatu ba xefe suku atuál sira sei falta fulan-rua resin.

“Ita-boot hateten xefe suku lejitimu mai husi povu bainhira iha forsa liu ba oin Governu sentrál sei servisu ho ita-boot sira makaas liu tán,”nia hateten.

Atu apoiu dezenvolve suku sira, nia hateten Sekretáriu Estadu Dezenvolvimentu Lokál iha prioridade tolu maka apoiu planu dezenvolvimentu Munisipál, planu dezenvolvimentu komunitária no servisu formasaun no efisénsia administrasaun lokál ne’ebé servisu barak liu ho xefi suku-sira

“Ha’u sei apoiu ita-boot sira sei dezenvolve planu estratéjiku no ita liga ba investimentu liliu planu operasionál hanesan planu nasionál dezenvolvimentu suku, tanba ne’e atu halo investimentu ne’ebé efisénsia no sustentavél ita tenke halo estudu kle’an,”nia hateten.

Entertantu,  atu realiza eleisaun ba xefe suku-sira maka daudaun ne’e, Sekretáriu Tékniku Administrasaun Eleitorál (STAE) Covalima halo ona preparasaun no loke ona vaga rekutamentu ba pesoál STAE hamutuk ema na’in-326  hodi apoiu suku no pesoál STAE apoiu aldeia (SPAA) iha eleisaun xefe suku.

Tuir dadus husi STAE munisipiu Covalima iha totál eleitór ne’ebé rejistu hamutuk  49.469 maihosi postu administrativu Fatululik, Fatumea, Fohorem, Fatumea, Tilomar, Maucatar,  Zumalai no Suai hamutuk 49, 469. Eleitór  ne’ebé mate ona iha munisípiu Covalima hamutuk nain 353.

Eleitór elijíevel tuir dadus STAE durante tinan 2023 iha munisípiu Covalima hamutuk 48.830.

Notísia Relevante :STAE Bobonaro ho líder lokál sira diskute preparasaun eleisaun suku

Jornalista: Celestina Teles

Editór:  Agapito dos Santos

iklan
iklan

Leave a Reply

iklan
error: Content is protected !!